സംസ്ഥാനത്ത് ഇനി മുതല്‍ ഡിജിറ്റൽ ആര്‍സി
ഇന്നലെ മുതൽ കേരളത്തിലെ വാഹന രജിസ്‌ട്രേഷന്‍ രേഖകൾ ഡിജിറ്റലായി മാറി. അതിനാൽ അപേക്ഷകര്‍ക്ക് ഡൗണ്‍ലോഡ് ചെയ്‌തെടുക്കാന്‍ പാകത്തില്‍ സോഫ്റ്റ്‌വേറില്‍ മാറ്റം വരുത്തിയിട്ടുണ്ട്. കേന്ദ്ര സര്‍ക്കാര്‍ മൊബൈല്‍ ആപ്പുകളായ ഡിജിലോക്കര്‍, എം പരിവാഹന്‍ എന്നിവയിലും ആര്‍സിയുടെ ഡിജിറ്റല്‍ പകര്‍പ്പ് ലഭിക്കും. വാഹന ഉടമകളെ ഏറെ വലച്ച പ്രശ്‌നത്തിനമാണ് ഇപ്പോൾ ഡിജിറ്റല്‍ സംവിധാനത്തിലൂടെ പരിഹരിക്കപ്പെടാൻ പോകുന്നത്.
ആർ സി ബുക്ക് ലഭിക്കാൻ നേരത്തെ കാലതാമസം നേരിട്ടിരുന്നു. ഡിജിറ്റലാകുന്നതോടെ വേഗത്തിൽ ആർ സി ലഭിക്കും.അതെസമയം ഡ്രൈവിങ് ലൈസൻസ്, ആർസി ബുക്ക് എന്നിവ അച്ചടിക്കുന്ന കാക്കനാട്ടുള്ള അച്ചടികേന്ദ്രത്തിന്റെ പ്രവര്‍ത്തനം താല്‍ക്കാലികമായി നിര്‍ത്തിവെച്ചിരിക്കുകയാണ്.
10 കോടി രൂപയോളം അച്ചടിക്കരാര്‍ ഏറ്റെടുത്തിട്ടുള്ള സ്ഥാപനത്തിനു കുടിശ്ശികയുണ്ട്. ഇതു നല്‍കാത്തതിനാല്‍ അച്ചടി പൂര്‍ണമായും നിര്‍ത്തിവെച്ചിരിക്കുകയാണ്. ഇതിനിടെയാണ് കാര്‍ഡ് വിതരണം പൂര്‍ണമായി ഒഴിവാക്കി ഡിജിറ്റലിലേക്കു മാറാനുള്ള സര്‍ക്കാരിന്റെ തീരുമാനം.
