തായ്‌ലൻഡ് വിപണിയിൽ വെറൈറ്റി കളറിൽ സുസുക്കി സ്വിഫ്റ്റ് സ്പെഷ്യൽ എഡിഷൻ: വില 14 ലക്ഷം രൂപ!
ലോകപ്രശസ്തമായ ഹാച്ച്ബാക്കുകളിൽ ഒന്നായ മാരുതി സുസുക്കി സ്വിഫ്റ്റിന്റെ നാലാം തലമുറ മോഡൽ ഇപ്പോഴും ഇന്ത്യയിലെ ഏറ്റവും പ്രിയപ്പെട്ട വാഹനങ്ങളിലൊന്നാണ്. ഇപ്പോഴിതാ, തായ്‌ലൻഡ് വിപണിയിൽ പ്രത്യേകം തയ്യാറാക്കിയ ഒരു സ്പെഷ്യൽ എഡിഷൻ മോഡലുമായി സുസുക്കി സാന്നിധ്യമറിയിച്ചിരിക്കുകയാണ്.
ഈ മോഡലിന് തായ്‌ലൻഡിൽ 567,000 ബാറ്റ് ആണ്, ഇന്ത്യയുടെ കണക്കിൽ ഏകദേശം 14 ലക്ഷം രൂപ വരും. ‘സുസുക്കി സ്വിഫ്റ്റ് സ്പെഷ്യൽ എഡിഷൻ’ എന്ന് പേരിട്ടിരിക്കുന്ന ഈ വാഹനം മോട്ടോർ എക്‌സ്‌പോ 2024-ലാണ് അവതരിപ്പിച്ചത്. ഈ മോട്ടോർ എക്‌സ്‌പോ നവംബർ 29 മുതൽ ഡിസംബർ 10 വരെ ഇംപാക്റ്റ് ചലഞ്ചർ മുവാങ്ങ് തോങ് താനിയിൽ നടക്കുന്നു.
വാഹനത്തിന്റെ മുഖ്യ ആകർഷണം അതിന്റെ വ്യത്യസ്തമായ നിറമാണ്. മുൻവശത്ത് പിങ്കിഷ് പർപ്പിൾ നിറവും പിന്നിൽ നീല ഷേഡുമുള്ളതാണ് ഈ വാഹനത്തിന്റെ ഡിസൈൻ. ചുവപ്പ്, വെള്ള, കറുപ്പ് ഷേഡുകളിൽ സ്ട്രിപ്പുകൾ നൽകിയിട്ടുള്ളത് വാഹനത്തിന് സ്പോർട്ടി ലുക്ക് നൽകുന്നു. കൂടാതെ, ഗ്ലോസ് ബ്ലാക്ക് ഫിനിഷ് അലോയ് വീലുകളും വാഹനത്തിന് പ്രത്യേക ചാരുതയേകുന്നു.
ഇന്ത്യയിൽ വിറ്റുപോയ മൂന്നാം തലമുറ സ്വിഫ്റ്റിന്റെ ഘടനയുമായി ഈ മോഡൽ ഏറെ സാമ്യമുള്ളതാണ്. എൽഇഡി പ്രൊജക്ടർ ഹെഡ്‌ലൈറ്റുകളും എൽഇഡി ടെയിൽ ലൈറ്റുകളും അതേ രൂപകൽപനയിൽ തന്നെയാണ്.
1.2-ലിറ്റർ K12M 4-സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിനാണ് ഈ പതിപ്പിൽ ഉപയോഗിച്ചിരിക്കുന്നത്. 83 PS പവറും 108 Nm ടോർക്കും സൃഷ്ടിക്കാൻ ഈ എഞ്ചിനിന് കഴിയും. സിവിടി ഗിയർബോക്സും ഇതിൽ ഉൾപ്പെടുത്തിയിട്ടുണ്ട്.
വ്യാപാരനീക്കത്തിന്റെ ഭാഗമായുള്ള ഫ്രീ പ്രോഗ്രാമിന്റെ ഭാഗമായി സുസുക്കി ഏഴ് വർഷത്തേക്ക് സൗജന്യ മെയിൻറനൻസ്, വാറന്റി, റോഡ് സൈഡ് അസിസ്റ്റൻസ് എന്നിവയും ഉപഭോക്താക്കൾക്ക് വാഗ്ദാനം ചെയ്യുന്നു. കൂടാതെ, ഉപഭോക്താക്കൾക്ക് നിരവധി പ്രത്യേക ആനുകൂല്യങ്ങളും കമ്പനി നൽകുന്നുണ്ട്. വില കൂടിയതായിരുന്നാലും, ഇതിന്റെ ഡിസൈനും പ്രത്യേകതകളും എക്കാലത്തും സ്വിഫ്റ്റിനെ ഇഷ്ടപ്പെടുന്നവർക്കൊരു ആകർഷണമാകുമെന്നാണ് പ്രതീക്ഷ.
