റബർ വിപണി പ്രതീക്ഷയിൽ; കൊക്കോ വിലയിൽ ഇടിവ്
സംസ്ഥാനത്തെ പ്രധാന വിപണികളിൽ റബറിന്റെ ക്ഷാമം രൂക്ഷമാകുമെന്ന പ്രവചനങ്ങൾ ടയർ നിർമ്മാതാക്കളെ ആശങ്കയിലാക്കി. ജനുവരിയിൽ പകൽ താപനില പതിവിനേക്കാൾ മൂന്ന് ഡിഗ്രി വരെ ഉയരുമെന്ന കാലാവസ്ഥ വകുപ്പിന്റെ മുന്നറിയിപ്പ് വ്യവസായ മേഖലയിലും അനിശ്ചിതത്വം സൃഷ്ടിച്ചിരിക്കുകയാണ്. ചൂട് കൂടുന്നതോടെ പല ഭാഗങ്ങളിലും കർഷകർ റബർ വെട്ട് ഒന്നിടവിട്ട ദിവസങ്ങളിലേക്ക് മാറ്റിയിരിക്കുകയാണ്. മരങ്ങളിൽ നിന്നുള്ള പാൽ ലഭ്യത കുറഞ്ഞതിനെ തുടർന്ന് അടുത്ത മാസം റബർ ടാപ്പിംഗ് പൂർണമായി നിലച്ചേക്കാമെന്ന ഭീതിയും ഉയരുന്നുണ്ട്.
റബർ ക്ഷാമം കണക്കിലെടുത്ത് ടയർ കമ്പനികൾ കർഷകരെയും സ്റ്റോക്കിസ്റ്റുകളെയും പ്രോത്സാഹിപ്പിക്കാൻ നാലാം ഗ്രേഡ് റബറിന്റെ വില 18,900 രൂപയിൽ നിന്നും 19,000 രൂപയാക്കി ഉയർത്തി. ഒരു പ്രമുഖ കമ്പനി 19,100 രൂപവരെയും വാഗ്ദാനം ചെയ്തുവെന്നാണ് വിപണി സൂചന. ഇന്ന് ഏഷ്യൻ റബർ മാർക്കറ്റുകളിൽ വില ചെറിയ തോതിൽ ഉയർന്നതായി റിപ്പോർട്ടുണ്ട്. ബാങ്കോക്കിൽ ഷീറ്റ് റബറിന്റെ വില 21,000 രൂപയായി വർധിക്കുകയും ജപ്പാൻ ഒസാക്ക എക്സ്ചേഞ്ചിലും റബർ നേട്ടത്തിലായിരിക്കുകയാണ്.
കേരളത്തിൽ നാളികേരോൽപ്പന്നങ്ങളുടെ വിലയിൽ മാറ്റമില്ലെങ്കിലും, തമിഴ്നാട് വിപണിയിൽ ചെറിയ തോതിലുള്ള വില തിരുത്തലിന്റെ സൂചനകളുണ്ട്. ശബരിമല തീർഥാടന സീസൺ അവസാനിച്ചതോടെ ചെറുകിട വിപണികളിൽ നാളികേര ലഭ്യത ഉയരുമെന്നാണ് കൊപ്ര വ്യവസായികളുടെ വിലയിരുത്തൽ.
ഏലക്ക വിപണിയിൽ ലഭ്യത കൂടിയതോടെ ആഭ്യന്തര വ്യാപാരികളും കയറ്റുമതി വ്യാപാരികളും ചരക്കുകൾ സംഭരിക്കുന്നത് വർധിച്ചിട്ടുണ്ട്. ശരാശരി ഇനങ്ങൾ 3012 രൂപയ്ക്കും മികച്ച ഗുണനിലവാരമുള്ള ഇനങ്ങൾ 3216 രൂപയ്ക്കും കൈമാറപ്പെടുന്നുണ്ട്. മൊത്തം 60,267 കിലോ ഏലക്കയുടെ ലേലം നടന്നു.
കൊക്കോയുടെ വിലയിൽ കുറവ് അനുഭവപ്പെട്ടുതുടങ്ങി. ഒരു മാസമായി 740 – 760 രൂപയുടെ നിരക്കിൽ വ്യാപാരം നടന്ന കൊക്കോവില ഇപ്പോൾ കുറയുകയാണ്. വിപണിയുടെ നിലയനുസരിച്ച് താൽക്കാലികമായി വില കൂടുതൽ കുറയാനുള്ള സാധ്യതയുണ്ടെന്ന് വിലയിരുത്തപ്പെടുന്നു. എന്നാൽ അന്താരാഷ്ട്ര മാർക്കറ്റുകളിൽ കൊക്കോയുടെ വില ഉയർന്ന നിലയിലാണ്.
