പുതിയ ഡിജിറ്റൽ വായ്പ സംവിധാനമായ യു എൽ ഐ പ്ലാറ്റഫോം പരിചയപ്പെടുത്തി റിസർവ് ബാങ്ക്

ഇന്ത്യയിൽ യുണിഫൈഡ് പേയ്‌മെന്റ് ഇന്റർഫേസ് (UPI) സേവനങ്ങൾ ലോകവ്യാപക ശ്രദ്ധ നേടിയിട്ടുണ്ട്. ഇന്ന് രാജ്യത്തിന്റെ എല്ലാ ഭാഗങ്ങളിലും UPI വിനിമയങ്ങൾ എളുപ്പം നടക്കുന്നു. ഡിജിറ്റൽ മാറ്റത്തിന്റെ ഈ മുന്നേറ്റം കൈവരിച്ച ഇന്ത്യയിൽ റിസർവ് ബാങ്ക് ഒരു പുതിയ സംവിധാനത്തെ പരിചയപ്പെടുത്തി. യുണിഫൈഡ് ലെൻഡിങ് ഇന്റർഫേസ് (ULI) എന്ന പ്ലാറ്റ്‌ഫോം വായ്പാ വിതരണത്തിൽ പുതിയതായി മാറ്റങ്ങൾ കൊണ്ടുവരാൻ ഉദ്ദേശിക്കുന്നു. ഈ പ്രോജക്ടുമായി ബന്ധപ്പെട്ട വിവരങ്ങൾ RBI ഗവർണർ ശക്തികാന്ത ദാസ് പുറത്തുവിട്ടു. എളുപ്പത്തിൽ ക്രെഡിറ്റ് സേവനങ്ങൾ ലഭ്യമാക്കുക എന്ന ലക്ഷ്യത്തോടെയാണ് ULI അവതരണം. ബെംഗളൂരുവിൽ നടന്ന DPI and Emerging Technologies കോൺഫറൻസിൽ സംസാരിക്കുമ്പോഴാണ് RBIയുടെ 90ാം വാർഷികത്തിന്റെ ഭാഗമായി ULI അവതരിപ്പിക്കുമെന്ന് ദാസ് അറിയിച്ചത്. ‘ഇപ്പോൾ UPI ഉപയോഗിച്ച് അതിവേഗം, സുരക്ഷിതമായി പണമിടപാട് നടത്തുകയാണ്. 2016-ൽ NPCI അവതരിപ്പിച്ച UPI ഇന്ത്യയിലെ ഡിജിറ്റൽ പേയ്‌മെന്റ് വളർച്ചയിൽ നിർണ്ണായക പങ്കുവഹിച്ചു. ഇതുപോലെ, റിസർവ് ബാങ്ക് കഴിഞ്ഞ വർഷം ക്രെഡിറ്റ് സേവനങ്ങൾക്കായി ഒരു പൈലറ്റ് പ്രോജക്ട് ആരംഭിച്ചു. ഈ യുണിഫൈഡ് ലെൻഡിങ് ഇന്റർഫേസ് (ULI) ഉടൻ പൂർണ്ണമായും പ്രവർത്തനക്ഷമമാകും’ – എന്നും ശക്തികാന്ത ദാസ് വ്യക്തമാക്കി.