ഇന്ത്യയിലെവിടേക്കും ഇൻ്റർനെറ്റ് കണക്ഷൻ മാറ്റാൻ സൗകര്യം അവതരിപ്പിച്ച് റിലയൻസ് ജിയോ
ഇന്ത്യയിലെവിടേക്കും നിലവിലുള്ള ഇൻ്റർനെറ്റ് കണക്ഷൻ മാറ്റാനുള്ള സൗകര്യം അവതരിപ്പിച്ച് റിലയൻസ് ജിയോ. നിലവിൽ താമസിക്കുന്നിടത്തു നിന്നും മറ്റൊരിടത്തേക്ക് മാറേണ്ടി വരുന്ന ആർക്കും നിലവിലുള്ള ജിയോ ഫൈബർ, എയർ ഫൈബർ കണക്ഷനുകൾ പുതിയ സ്ഥലത്തേക്കും മാറ്റാൻ കഴിയും. അതിനുള്ള സൗകര്യം ജിയോ വെബ്സൈറ്റിൽ ഒരുക്കിയിട്ടുണ്ട്. അതിനാൽ ദീർഘകാല പ്ലാനുകൾ തെരഞ്ഞെടുത്ത ഉപയോക്താക്കൾക്ക് മറ്റ് അധിക ചെലവുകൾ ഇല്ലാതെ തന്നെ മറ്റൊരിടത്തും ജിയോ ഇൻ്റർനെറ്റ് സേവനങ്ങൾ ഉപയോഗിക്കാം.
ഉപയോക്താക്കൾ തങ്ങളുടെ നിലവിലുള്ള ജിയോ ഫൈബർ അല്ലെങ്കിൽ ജിയോ എയർ ഫൈബർ കണക്ഷൻ മാറ്റിസ്ഥാപിക്കുന്നതിന്, മൊബൈൽ ആപ്പ് വഴിയോ വെബ്സൈറ്റ് വഴിയോ മൈജിയോ അക്കൗണ്ടിലേക്ക് ലോഗിൻ ചെയ്യുക ശേഷം പുതിയ വിലാസം നൽകുക. പുതിയ സ്ഥലത്ത് ജിയോ ഫൈബർ സേവനങ്ങൾ ലഭ്യമല്ലെങ്കിൽ, നിങ്ങളുടെ കണക്ഷൻ എയർ ഫൈബറിലേക്ക് മാറിയേക്കാം. എയർ ഫൈബറും ഫൈബറും ഇല്ലെങ്കിൽ എന്ത് ചെയ്യുമെന്നത് വ്യക്തമല്ല.
ജിയോയുടെ എയർ ഫൈബർ സേവനം ഇപ്പോൾ ഇന്ത്യയുടെ പല ഭാഗങ്ങളിലും നിലവിലുണ്ട്.കണക്ഷൻ പുതിയ സ്ഥലത്തേക്ക് മാറ്റുന്നതിന് മൈജിയോ അക്കൗണ്ട് വഴി അപ്പോയിൻ്റ്മെൻ്റ് ബുക്ക് ചെയ്യുക. വിവരങ്ങൾ നൽകി കഴിഞ്ഞാൽ അവ സ്ഥിരീകരിച്ച ശേഷം ജിയോ അഭ്യർത്ഥന സ്ഥിരീകരിക്കും. ഇൻ്റർനെറ്റ് കണക്ഷൻ മാറുന്നതിനായി ഒരു ജിയോ ഉപയോക്താവ് ഇത്ര മാത്രമെ ചെയ്യേണ്ടതുള്ളൂ.
