കൊച്ചി മെട്രോയുടെ ‘മെട്രോ കണക്ട്’: ഇലക്ട്രിക് ബസ് സർവീസ് അടുത്തയാഴ്ച മുതൽ ആരംഭിക്കും

കൊച്ചിയിൽ ഗതാഗത പരിഷ്‌കരണം തുടർന്നുകൊണ്ട്, മെട്രോ ട്രാക്കിലും വെള്ളത്തിലും സ്ഥാനം നേടിയ കൊച്ചി മെട്രോ ഇലക്ട്രിക് ബസ് സർവീസിന് തുടക്കം കുറിക്കുന്നു. ‘മെട്രോ കണക്ട്’ എന്ന പേരിൽ ആരംഭിക്കുന്ന പുതിയ സേവനം അടുത്ത ആഴ്ച മുതൽ പ്രവർത്തനക്ഷമമാകും. പരീക്ഷണയോട്ടങ്ങൾ വിജയകരമായി പൂർത്തിയായിട്ടുണ്ട്.

സർവീസുകൾ ആരംഭിക്കുന്ന റൂട്ടുകൾ

ആലുവ-ഇന്റർനാഷണൽ എയർപോർട്ട്, കളമശേരി-മെഡിക്കൽ കോളജ്, ഹൈക്കോടതി-എം.ജി റോഡ് സർക്കുലർ, കടവന്ത്ര-കെ.പി വള്ളോൻ റോഡ്, കാക്കനാട് വാട്ടർമെട്രോ-ഇൻഫോപാർക്ക്, കിൻഫ്രപാർക്ക്, കളക്ട്രേറ്റ് എന്നിവയാണ് തുടങ്ങിവരുന്ന റൂട്ടുകൾ. എയർപോർട്ട് റൂട്ടിൽ 80 രൂപയും, മറ്റ് റൂട്ടുകളിൽ 5 കിലോമീറ്റർ യാത്രയ്ക്ക് മിനിമം 20 രൂപയുമാണ് യാത്ര നിരക്ക്.

സൗകര്യങ്ങൾ

15 എയർകണ്ടീഷൻ ഇലക്ട്രിക് ബസുകൾ ഉൾപ്പെടുത്തി കൊച്ചി മെട്രോ ഫസ്റ്റ് മൈൽ-ലാസ്റ്റ് മൈൽ കണക്ടിവിറ്റിയെ മെച്ചപ്പെടുത്തുകയാണ് ലക്ഷ്യം. 33 സീറ്റുകളുള്ള ബസുകൾക്ക് മുട്ടം, കലൂർ, വൈറ്റില, ആലുവ എന്നിവിടങ്ങളിൽ ചാർജിംഗ് സ്റ്റേഷനുകളുണ്ട്. യാത്രാ ടിക്കറ്റുകൾ ഡിജിറ്റൽ പേയ്‌മെന്റ് സംവിധാനത്തിലൂടെയാകും ലഭ്യമാകുക. UPI, RuPay ഡെബിറ്റ് കാർഡ്, കൊച്ചി വൺ കാർഡ് എന്നിവ വഴിയും കാഷ് ട്രാൻസാക്ഷൻ വഴിയും ടിക്കറ്റിംഗ് സൗകര്യം ഒരുക്കിയിട്ടുണ്ട്.

സർവീസ് സമയം

എയർപോർട്ട് റൂട്ടിൽ തിരക്കുള്ള സമയത്ത് 20 മിനിറ്റ് ഇടവിട്ട് ബസുകൾ ലഭിക്കും. തിരക്കില്ലാത്ത സമയങ്ങളിൽ 30 മിനിറ്റ് ഇടവിട്ടാണ് സർവീസ്. രാവിലെ 6.45 മുതൽ ആരംഭിച്ച് രാത്രി 11 മണിയോടെയാണ് അവസാന സർവീസ്.

മറ്റ് റൂട്ടുകൾ

– കളമശേരി-മെഡിക്കൽ കോളജ്: 30 മിനിറ്റ് ഇടവിട്ട് സർവീസ്, 8.30 AM മുതൽ 7.30 PM വരെ.

– കാക്കനാട് വാട്ടർ മെട്രോ – ഇൻഫോപാർക്ക് : 25 മിനിറ്റ് ഇടവിട്ട്, 8.00 AM മുതൽ 7.00 PM വരെ.

– കാക്കനാട് വാട്ടർ മെട്രോ-കളക്ട്രേറ്റ്: 20 മിനിറ്റ് ഇടവിട്ട്, 8.00 AM മുതൽ 7.30 PM വരെ.

– ഹൈക്കോടതി-എം.ജി റോഡ് സർക്കുലർ: 10 മിനിറ്റ് ഇടവിട്ട്, 8.30 AM മുതൽ 7.30 PM വരെ.

– കടവന്ത്ര-കെ.പി വള്ളോൻ റോഡ്: 25 മിനിറ്റ് ഇടവിട്ട്, 9.00 AM മുതൽ 7.00 PM വരെ.

പദ്ധതിയുടെ ലക്ഷ്യം

മുന്‍നിര ഗതാഗത സൗകര്യങ്ങൾ ഉറപ്പാക്കുകയും, ഉപയോക്താക്കൾക്ക് കൂടുതല്‍ സൗകര്യപ്രദമായ യാത്രാ അനുഭവം നൽകുകയും ചെയ്യുന്നതാണ് കെ.എം.ആർ.എല്ലിന്റെ ലക്ഷ്യം. പുതിയ ഇലക്ട്രിക് ബസ് സർവീസുകൾ നഗര ഗതാഗതത്തിൽ വലിയ മാറ്റം കൊണ്ടുവരും.