കേരളത്തില്‍ നിക്ഷേപ സാധ്യതകള്‍ ഉയര്‍ന്നതായി വ്യവസായ മന്ത്രി പി. രാജീവ്
ദാവോസ്: കേരളത്തിന്റെ ഗ്രീന്‍ ഹൈഡ്രജന്‍ ക്ലസ്റ്റര്‍ പദ്ധതി ഡീകാര്‍ബണൈസേഷന്‍ പദ്ധതികളുടെ ഭാഗമായി വേള്‍ഡ് ഇക്കണോമിക് ഫോറത്തിന്റെ അംഗീകാരം ലഭിച്ചതായി സംസ്ഥാന വ്യവസായമന്ത്രി പി. രാജീവ്. വേള്‍ഡ് ഇക്കണോമിക് ഫോറം അംഗീകരിച്ച 13 പദ്ധതികളില്‍ ഒന്നാണ് കേരളം അവതരിപ്പിച്ച പദ്ധതി. ദാവോസില്‍ നടന്ന വേള്‍ഡ് ഇക്കണോമിക് ഫോറത്തില്‍, വിഴിഞ്ഞം കോണ്‍ക്ലേവിനോടനുബന്ധിച്ച് മാധ്യമങ്ങളോട് സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്. ഹരിതഗൃഹ വാതക ഉദ്വമനം കുറയ്ക്കുന്നതിന് രൂപകല്‍പ്പന ചെയ്തിരിക്കുന്ന ഈ പദ്ധതി 1.2 ബില്യണ്‍ യുഎസ് ഡോളര്‍ (ഏകദേശം ₹10,000 കോടി) നിക്ഷേപ സാധ്യതയുള്ളതാണെന്ന് മന്ത്രി അറിയിച്ചു. വേള്‍ഡ് ഇക്കണോമിക് ഫോറത്തിന്റെ ആദ്യത്തെ അംഗീകൃത പദ്ധതികളില്‍ കേരളം ഇടം പിടിച്ചതും സംസ്ഥാനത്തിന് വലിയ നേട്ടമാണെന്നും ഒരുമിച്ച് പ്രവര്‍ത്തിച്ചാല്‍ മികച്ച നിക്ഷേപം കേരളത്തിലേക്ക് ആകര്‍ഷിക്കാന്‍ കഴിയും എന്നും അദ്ദേഹം കൂട്ടിച്ചേര്‍ത്തു.
കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്മെന്റ് കോര്‍പ്പറേഷന്‍ (കെഎസ്‌ഐഡിസി) പുറത്തിറക്കിയ പ്രസ്താവനയിലും 55-ാമത് വേള്‍ഡ് ഇക്കണോമിക് ഫോറം വാര്‍ഷിക യോഗത്തില്‍ ഈ പദ്ധതിക്ക് അംഗീകാരം ലഭിച്ചതായി വ്യക്തമാക്കിയിട്ടുണ്ട്. ഓസ്ട്രേലിയ, ബ്രസീല്‍, കൊളംബിയ, ഇന്ത്യ, നെതര്‍ലാന്‍ഡ്സ്, സൗദി അറേബ്യ, സ്വീഡന്‍, തായ്ലന്‍ഡ്, യുകെ തുടങ്ങിയ രാജ്യങ്ങളിലാണ് വേള്‍ഡ് ഇക്കണോമിക് ഫോറം അംഗീകരിച്ച പദ്ധതികള്‍ പ്രാവര്‍ത്തികമാകുന്നത്.
കേരളത്തില്‍ കാര്‍ബണ്‍ ഉദ്വമനം 50% വരെയെത്തുന്ന മേഖലകളില്‍ കുറവുണ്ടാക്കുന്നതിനാണ് ഈ പദ്ധതി ലക്ഷ്യമിടുന്നത്. ചീഫ് സെക്രട്ടറി, വ്യവസായ സെക്രട്ടറി, സര്‍ക്കാര്‍ പ്രിന്‍സിപ്പല്‍ സെക്രട്ടറി തുടങ്ങിയവര്‍ ദാവോസില്‍ പങ്കെടുത്തത് നിക്ഷേപകര്‍ ഗൗരവത്തോടെ കണ്ടുവെന്ന് മന്ത്രി പറഞ്ഞു. വ്യവസായ പ്രമുഖരുമായി 70-ലധികം വണ്‍-ടു-വണ്‍ ചര്‍ച്ചകള്‍ നടത്തിയതായി പി. രാജീവ് അറിയിച്ചു. അനേകം ആഗോള കമ്പനികള്‍ കേരളത്തില്‍ നിക്ഷേപിക്കാന്‍ താല്‍പര്യം പ്രകടിപ്പിച്ചിട്ടുണ്ടെന്നും, അവരുടെ നിക്ഷേപ തുക ഫെബ്രുവരി 21 അല്ലെങ്കില്‍ 22ന് വെളിപ്പെടുത്തുമെന്നും അദ്ദേഹം അറിയിച്ചു. 2025-ല്‍ നടക്കുന്ന ഇന്‍വെസ്റ്റ് കേരള ഗ്ലോബല്‍ സമ്മിറ്റിലും (IKGS 2025) നിരവധി പ്രമുഖര്‍ പങ്കെടുക്കുമെന്നാണ് പ്രതീക്ഷ.
