ഐഎഫ്എഫ് ഫാഷൻ എക്സ്പോ ആറു മുതൽ എട്ടു വരെ
കൊച്ചി: കേരളത്തിലെ ഏറ്റവും വലിയ ബി ടു ബി ഫാഷൻ പ്രദർശനമായ ഇന്ത്യൻ ഫാഷൻ ഫെയർ (ഐഎഫ്എഫ്) എക്സ്പോയുടെ നാലാം പതിപ്പ് ആറുമുതൽ എട്ടുവരെ അങ്കമാലി അഡ്ലക്സ് ഇന്റർനാഷണൽ കൺവൻഷൻ സെന്ററിൽ സംഘടിപ്പിക്കും.
ആറാം തിയതി രാവിലെ പത്തിന് ഉദ്ഘാടനം മന്ത്രി പി. രാജീവ് നിർവഹിക്കും. ഐഎഫ്എഫ് അവാർഡ് നിശ പ്രതിപക്ഷനേതാവ് വി.ഡി. സതീശൻ ഉദ്ഘാടനം ചെയ്യും.രാജ്യത്തെ പ്രമുഖ ലൈഫ്സ്റ്റൈൽ ഫാഷൻ ബ്രാൻഡുകൾ, വസ്ത്രവ്യാപാരികൾ, നിർമാതാക്കൾ, ഹോൾസെയിലർമാർ, റീട്ടെയിലർമാർ തുടങ്ങിയവർ ചടങ്ങിൽ പങ്കെടുക്കും.
മുംബൈ, കോൽക്കത്ത, ജയ്പുർ, സൂറത്ത് എന്നീ പ്രധാന ഫാഷൻ ഹബ്ബുകളിൽനിന്നുള്ള 200ലധികം പ്രമുഖ ബ്രാൻഡുകൾ പങ്കെടുക്കുമെന്ന് ഐഎഫ്എഫ് എക്സ്പോ ഡയറക്ടർ സമീർ മൂപ്പൻ വ്യക്തമാക്കി. കൂടാതെ ഫാഷൻ ഷോ, അവാർഡ് നൈറ്റ്, സാംസ്കാരിക പരിപാടികൾ എന്നിവയുമുണ്ടാകും.
