ഹ്യുണ്ടായി ഓറ കോർപ്പറേറ്റ് ട്രിം ഇന്ത്യയിൽ എത്തി; വില 7.48 ലക്ഷം മുതൽ
പെട്രോൾ, സിഎൻജി ഇന്ധന ഓപ്ഷനുകളുള്ള പുതിയ ഓറ കോർപ്പറേറ്റ് ട്രിം അവതരിപ്പിച്ച് ഹ്യുണ്ടായി മോട്ടോർ ഇന്ത്യ. ഇവയുടെ എക്സ്-ഷോറൂം വില യഥാക്രമം 7.48 ലക്ഷം രൂപയും 8.47 ലക്ഷം രൂപയുമാണ്. പുതിയ ഹ്യുണ്ടായി ഓറ കോർപ്പറേറ്റ് ട്രിം എസ്-ന് മുകളിലും എസ്എക്സ് ട്രിമ്മുകൾക്ക് താഴെയുമാണ് സ്ഥാപിച്ചിരിക്കുന്നത്. ഏകദേശം 10,000 രൂപ എസ് വേരിയന്റുകളേക്കാൾ കൂടുതലാണ്. 6.54 ലക്ഷം രൂപ മുതൽ 9.11 ലക്ഷം രൂപ വരെയാണ് ഓറ സെഡാൻ മോഡൽ ലൈനപ്പിന് നിലവിലെ എക്സ്-ഷോറൂം വില പരിധി.ഓറ കോർപ്പറേറ്റ് ട്രിമിന്റെ രൂപകൽപ്പനയും സ്റ്റൈലിംഗും സാധാരണ മോഡലിന് സമാനമാണ്. ‘കോർപ്പറേറ്റ്’ ചിഹ്നം മാത്രമാണ് വ്യത്യസ്തമാക്കുന്നത്. പുതിയ ട്രിമ്മിൽ എൽഇഡി ഡിആർഎൽ, വീൽ കവറുകൾ ഉള്ള 15 ഇഞ്ച് സ്റ്റീൽ വീലുകൾ, റിയർ വിംഗ് സ്‌പോയിലർ എന്നിവ ഉൾപ്പെടുന്നു.
ക്യാബിനിൽ 6.5 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, കപ്പ് ഹോൾഡറുകളുള്ള ആംറെസ്റ്റ്, പിൻ എസി വെന്റുകൾ, ഇൻസ്ട്രുമെന്റ് ക്ലസ്റ്ററിൽ 3.5 ഇഞ്ച് MID, 2-DIN ഇന്റഗ്രേറ്റഡ് ഓഡിയോ സിസ്റ്റം, 4 സ്പീക്കറുകൾ, പിൻ പവർ വിൻഡോകൾ, യുഎസ്ബി കണക്റ്റിവിറ്റി, കീലെസ് എൻട്രി, ഇലക്ട്രിക്കലി ക്രമീകരിക്കാവുന്ന വിംഗ് മിററുകൾ, ഡ്രൈവർ സീറ്റ് ഉയര ക്രമീകരണം, ടൈപ്പ്-സി ചാർജിംഗ് പോർട്ട്, ടയർ പ്രഷർ മോണിറ്ററിംഗ് സിസ്റ്റം എന്നിവയുണ്ട്. ഓറ കോംപാക്റ്റ് സെഡാന്റെ പുതിയ വകഭേദത്തിലും 1.2 ലിറ്റർ, 4 സിലിണ്ടർ പെട്രോൾ എഞ്ചിൻ തന്നെയാണ് ഉപയോഗിക്കുന്നത്, ഇത് പരമാവധി 83 bhp കരുത്തും 114 Nm ടോർക്കും ഉത്പാദിപ്പിക്കുന്നു. സിഎൻജി വകഭേദത്തിൽ, ഇത് 69 bhp കരുത്തും 95 Nm ടോർക്കും ഉത്പാദിപ്പിക്കുന്നു. അഞ്ച് സ്‍പീഡ് മാനുവൽ ഗിയർബോക്‌സ് മാത്രമേ പുതിയ കോർപ്പറേറ്റ് വകഭേദത്തിൽ ലഭ്യമാകൂ.
