വമ്പൻ സുരക്ഷയും ആകർഷക ഫീച്ചറുകളും; ബ്രെസയെയും നെക്സോണിനെയും നേരിടാൻ കിയ സിറോസ് ഫെബ്രുവരിയിൽ

കിയ ഇന്ത്യ 2025 ഫെബ്രുവരി 1-ന് സിറോസ് കോംപാക്റ്റ് എസ്‌യുവിയുടെ ഔദ്യോഗിക വില പ്രഖ്യാപിക്കും. ഡെലിവറികൾ ഫെബ്രുവരി രണ്ടാം പകുതിയിൽ ആരംഭിക്കുമെന്ന് കമ്പനി അറിയിച്ചു. സിറോസിന്റെ ബുക്കിംഗ് ഇതിനകം തന്നെ ആരംഭിച്ചിരിക്കുകയാണ്. ഉപഭോക്താക്കൾക്ക് ഓൺലൈനായോ അല്ലെങ്കിൽ സമീപത്തെ കിയ ഡീലർഷിപ്പിലൂടെയോ മോഡൽ ബുക്ക് ചെയ്യാനുള്ള സൗകര്യമുണ്ട്.

സിറോസ് രണ്ട് എഞ്ചിൻ ഓപ്ഷനുകളിൽ ലഭ്യമാകും. 1.0-ലിറ്റർ T-GDi പെട്രോൾ എഞ്ചിൻ 120 bhp കരുത്തും 172 Nm ടോർക്കും നൽകും. അതേസമയം, 1.5-ലിറ്റർ CRDi VGT ഡീസൽ എഞ്ചിൻ 116 bhp കരുത്തും 250 Nm ടോർക്കും ഉത്പാദിപ്പിക്കും. ട്രാൻസ്മിഷൻ ഓപ്ഷനുകൾ 6-സ്പീഡ് മാനുവൽ, 6-സ്പീഡ് ഓട്ടോമാറ്റിക് (ഡീസൽ), 7-സ്പീഡ് DCT ഓട്ടോമാറ്റിക് (പെട്രോൾ) എന്നിവയാണുൾപ്പെടുന്നത്. സിറോസിന്റെ ഫീച്ചറുകൾ വലിയ ആകർഷണങ്ങളാണ്. വെന്റിലേറ്റഡ് പിൻ സീറ്റുകൾ, 64 നിറങ്ങളുള്ള ആംബിയന്റ് ലൈറ്റിംഗ്, സൈഡ് പാർക്കിംഗ് സെൻസറുകൾ, ഫ്ലഷ്-ടൈപ്പ് ഡോർ ഹാൻഡിലുകൾ, ഡിജിറ്റൽ എസി കൺട്രോൾ യൂണിറ്റ് തുടങ്ങിയവ ഇതിലുണ്ട്. ഡ്യുവൽ 12.3 ഇഞ്ച് ഡിസ്‌പ്ലേകൾ, 8 സ്പീക്കർ ഹർമൻ കാർഡൻ ഓഡിയോ സിസ്റ്റം, വയർലെസ് ചാർജിംഗ്, വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ, പനോരമിക് സൺറൂഫ്, പവർഡ് ഡ്രൈവർ സീറ്റ് എന്നിവയും സിറോസിന്റെ പ്രത്യേകതകളിലാണ്.

സുരക്ഷക്കായി ആറ് എയർബാഗുകൾ, ഹിൽ-സ്റ്റാർട്ട് അസിസ്റ്റ്, ഫ്രണ്ട്-റിയർ പാർക്കിംഗ് സെൻസറുകൾ, ഐസോഫിക്സ് ചൈൽഡ് ആങ്കറുകൾ, ലെൻ കീപ്പിംഗ് അസിസ്റ്റ്, ഫോർവേഡ് കൂട്ടിയിടി മുന്നറിയിപ്പ് എന്നിവയുമായി ലെവൽ 1 ADAS സജ്ജീകരണങ്ങളും സിറോസിൽ ലഭ്യമാണ്. ടാറ്റ നെക്‌സോൺ, മഹീന്ദ്ര XUV 300, ഹ്യുണ്ടായ് ക്രെറ്റ, മാരുതി ഗ്രാൻഡ് വിറ്റാര എന്നിവയുമായാണ് കിയ സിറോസ് മത്സരിക്കുന്നത്. മോഡലിന് ഒമ്പത് ലക്ഷം രൂപ പ്രാരംഭ എക്സ്-ഷോറൂം വില പ്രതീക്ഷിക്കപ്പെടുന്നു. 2025 ഫെബ്രുവരി 1-ന് ഇതിന്റെ സമ്പൂർണ്ണ വില കമ്പനി പ്രഖ്യാപിക്കും.