കറിവേപ്പിലയും ഉള്ളിയും ഇഞ്ചിയും കറി വയ്ക്കാൻ മാത്രമല്ലഇനിയുമുണ്ട് ഗുണങ്ങൾ
മുടി വളർത്തുന്നത് അത്ര എളുപ്പമുള്ള കാര്യമല്ലെന്ന് എല്ലാവർക്കുമറിയാം. നല്ല രീതിയിൽ മുടി സംരക്ഷണം ഉറപ്പാക്കേണ്ടത് വളരെ പ്രധാനമാണ്. മുടികൊഴിച്ചിൽ കുറയ്ക്കാനും അതുപോലെ മുടി നന്നായി വളർത്തിയെടുക്കാനും വീട്ടിലെ അടുക്കളയിൽ തന്നെ പരിഹാര മാർഗങ്ങളുണ്ട്. അടുക്കളയിൽ ഉപയോഗിക്കുന്ന പല ചേരുവകളും എളുപ്പത്തിൽ മുടി കൊഴിച്ചിൽ നിർത്താൻ സഹായിക്കുന്നവയാണ്. സവാളയാണ് ഇതിലെ പ്രധാന ചേരുവ മുടികൊഴിച്ചിൽ മാറ്റാൻ സവാള വളരെ നല്ലതാണ്.
ഇഞ്ചി
ദഹന പ്രശ്നങ്ങൾ മാറ്റാൻ വളരെ മികച്ചതാണ് ഇഞ്ചിയെന്ന് എല്ലാവർക്കുമറിയാം. അതുപോലെ മുടിയ്ക്കും ഇഞ്ചി നല്ലതാണ്. ഇഞ്ചിയിൽ അടങ്ങിയിരിക്കുന്ന ശക്തമായ ആൻ്റിഓക്‌സിഡൻ്റുകൾ മുടിക്ക് പോഷണം നൽകുന്നത് ഏറെ സഹായിക്കും. കൂടാതെ ഇത് മുടിയ്ക്ക് മെച്ചപ്പെട്ട രൂപവും ഭാവവും നൽകുന്നു. ഇഞ്ചിയിൽ അടങ്ങിയിരിക്കുന്ന ആൻ്റിഓക്‌സിഡൻ്റുകൾ രോമകൂപങ്ങളെ സംരക്ഷിക്കുകയും കേടുപാടുകൾ കുറയ്ക്കുകയും ചെയ്യുന്നു. മുടി നന്നായി വളർത്തിയെടുക്കാൻ ഇഞ്ചി സഹായിക്കും. ഇതിലെ ആൻ്റി ബാക്ടീരിയൽ ഗുണങ്ങളെ തലയോട്ടിയിലെ മറ്റ് പ്രശ്നങ്ങളെ ഇല്ലാതാക്കാൻ മികച്ചതാണ്.
സവാള
എല്ലാ വീടുകളിലും സുലഭമായി ലഭിക്കുന്നതാണ് സവാള. ഇത് പല തരത്തിലുള്ള ഗുണങ്ങളാണ് മുടിയ്ക്ക് നൽകുന്നത്. മുടികൊഴിച്ചിൽ മാറ്റാൻ ഏറെ മികച്ചതാണ് സവാള. ഇതിൽ അടങ്ങിയിരിക്കുന്ന സൾഫറാണ് മുടി വളർത്താൻ ഏറ്റവുമധികം സഹായിക്കുന്നത്. മുടിയ്ക്കാവശ്യമായ എല്ലാ പോഷകങ്ങളും സവാള നൽകുന്നുണ്ട്. ഉള്ളിയിൽ നിന്നുള്ള സൾഫർ കൊളാജൻ ഉൽപ്പാദനം പ്രോത്സാഹിപ്പിക്കാനും സഹായിക്കും. കൊളാജൻ ആരോഗ്യകരമായ ചർമ്മകോശങ്ങളുടെ ഉത്പാദനത്തിനും മുടി വളർച്ചയ്ക്കും സഹായിക്കുന്നതാണ്.
കറിവേപ്പില
കറികൾക്ക് നല്ല മണവും രുചിയും നൽകുന്നതാണ് കറിവേപ്പില. പക്ഷെ ആവശ്യം കഴിഞ്ഞാൽ പലരും കറിവേപ്പില വലിച്ചെറിയുകയാണ് പതിവ്. എന്നാൽ ഇനി അത് ചെയ്യരുത്. കാരണം കറിവേപ്പില മുടിയുടെ ഉറ്റ സുഹൃത്താണ്. മുടികൊഴിച്ചിൽ കുറയ്ക്കാനും അകാല നര പോലെയുള്ള പ്രശ്നങ്ങൾ മാറ്റാനും കറിവേപ്പില സഹായിക്കും. കറിവേപ്പിലയിൽ ആൻ്റിഓക്‌സിഡൻ്റുകൾ ധാരാളമായി അടങ്ങിയിട്ടുണ്ട്, ഇത് തലയോട്ടിയിലെ ഈർപ്പം വർദ്ധിപ്പിക്കുകയും മൃത രോമകൂപങ്ങളെ നീക്കം ചെയ്യുകയും ചെയ്യുന്നു. ഇതിലെ ഉയർന്ന അളവിലുള്ള ബീറ്റാ കരോട്ടിൻ, പ്രോട്ടീൻ എന്നിവ മുടി കൊഴിച്ചിൽ തടയുന്നതിനും മുടി വളരാൻ സഹായിക്കുന്നതുമാണ്.
