പുതിയ ഉപഭോക്താക്കള്ക്ക് ദീപാവലി സമ്മാനവുമായി ബിഎസ്എൻഎല്
ഈ ദീപാവലി ആഘോഷമാക്കാൻ പുത്തൻ സമ്മാനങ്ങളുമായി ഉപഭോക്താക്കളെ കാത്തിരിക്കുകയാണ് ബി എസ് എൻ എല്. നിരക്ക് കുത്തനെ ഉയർത്തി ഉപഭോക്താക്കളുടെ നട്ടെല്ലൊടിച്ച ജിയോക്കും എയർടെല്ലിനും വെല്ലുവിളി ഉയർത്തിയാണ് കൂടുതല് കസ്റ്റമേഴ്സിനെ ആകർഷിക്കാൻ ദീപാവലി ഓഫറുകളുമായി ബി എസ് എൻ എല് കളത്തിലിറങ്ങിയത്.
സൗജന്യ 4 ജി സേവനങ്ങള്ക്കൊപ്പം ആദ്യത്തെ ഒരു മാസത്തേക്ക് അണ്ലിമിറ്റഡ് കോളിംഗ്, പ്രതിദിനം 2 ജിബി ഡാറ്റ തുടങ്ങിയവ സൗജന്യമായി ലഭിക്കും. ആദ്യമായി പ്രീപെയ്ഡ് കണക്ഷൻ എടുക്കുന്ന ഉപയോക്താക്കള്ക്കായിട്ടാണ് ഇന്ത്യയിലെ ഏറ്റവും വലിയ പൊതുമേഖലാ വാർത്താവിനിമയ കമ്പനിയായ ബിഎസ്എൻഎല് ഉത്സവകാല ഓഫറുമായി എത്തിയിരിക്കുന്നത്.
ആദ്യമായി ബി എസ് എൻ എല് സിം എടുക്കുന്നവർക്ക് ഈ പ്ലാൻ പ്രകാരം ആദ്യത്തെ ഒരു മാസത്തേക്ക് (30 ദിവസം) ദിനേന 2 ജിബി ഡാറ്റയും പരിധിയില്ലാത്ത കോളിംഗ് സേവനങ്ങളും ഫ്രീയായി ലഭിക്കും. ഇന്ത്യയിലെ എല്ലാ സർക്കിളുകളിലും ഒക്ടോബർ 15 മുതല് നവംബർ 15 വരെ ഈ ഓഫർ ലഭ്യമാണ്. വെറും ഒരു രൂപ ടോക്കണ് തുകയായി നല്കി ആർക്ക് വേണമെങ്കിലും പുതിയ സിം എടുക്കാനാവും.
