ഭാരതി എയർടെൽ: ലാഭത്തിൽ വൻ വർധന
ടെലികോം ഓപ്പറേറ്ററായ ഭാരതി എയർടെല്ലിന്റെ 2025 മാർച്ചിലെ അവസാന പാദത്തിന്റെ ലാഭം അഞ്ച് മടങ്ങ് വർധിച്ച് 11,022 കോടി രൂപയായി. 2,071.6 കോടി രൂപയായിരുന്നു മുൻ സാമ്പത്തിക വർഷം ഇതേ പാദത്തിൽ കമ്പനിയുടെ അറ്റാദായം.
കമ്പനി റെഗുലേറ്ററി ഫയലിംഗിൽ പ്രവർത്തന വരുമാനം അവലോകന പാദത്തിൽ 27 ശതമാനം വർധിച്ച് 47,876.2 കോടി രൂപയായതായി അറിയിച്ചു. ഭാരതി എയർടെൽ ഇന്ത്യയുടെ മാർച്ച് പാദത്തിൽ സ്റ്റാൻഡലോൺ വരുമാനം 31,851.5 കോടി രൂപയിൽ നിന്ന് 15 ശതമാനം വർധിച്ച് 36,735 കോടി രൂപയായി. കമ്പനിയുടെ വളർച്ചയ്ക്ക് കാരണം കഴിഞ്ഞ വർഷം ജൂലൈയിൽ പ്രഖ്യാപിച്ച താരിഫ് വർദ്ധനവിന്റെ നേട്ടമാണ്.
2025 മാർച്ച് 31 ന് അവസാനിച്ച സാമ്പത്തിക വർഷത്തിൽ, എയർടെൽ സംയോജിത അറ്റാദായത്തിൽ ഏകദേശം നാലിരട്ടി വർധിച്ച് 33,556 കോടി രൂപയായി. 2024 സാമ്പത്തിക വർഷത്തിൽ 7,467 കോടി രൂപയായിരുന്നു.
2025 സാമ്പത്തിക വർഷത്തിൽ ഭാരതി എയർടെല്ലിന്റെ പ്രവർത്തനങ്ങളിൽ നിന്നുള്ള വാർഷിക വരുമാനം 15.33 ശതമാനം വർധിച്ച് 1,72,985.2 കോടി രൂപയായി. 2024 സാമ്പത്തിക വർഷത്തിൽ ഇത് 1,49,982.4 കോടി രൂപയായിരുന്നു.
