സാമൂഹിക-സാമ്പത്തിക വളര്‍ച്ചയില്‍ ബെംഗളൂരു മുന്‍നിരയില്‍; അതിവേഗം വളരുന്ന നഗരം ഹൈദരാബാദ്
ബെംഗളൂരു സാമ്പത്തിക വളര്‍ച്ചയില്‍ മുന്നില്‍, തൊഴില്‍ പങ്കാളിത്തത്തില്‍ രാജ്യത്തെ ഒട്ടുമുകളിൽ സാമൂഹിക-സാമ്പത്തിക വളര്‍ച്ചയുടെ കാര്യത്തില്‍ ബെംഗളൂരു മുന്നേറ്റം കൈവരിച്ചിരിക്കുന്നുവെന്ന് നൈറ്റ് ഫ്രാങ്ക് പ്രൈം സിറ്റി ഇന്‍ഡക്‌സ് റിപ്പോര്‍ട്ട് ചെയ്തു. ഇന്ത്യയിലെ എറ്റവും ഉയര്‍ന്ന 76% തൊഴില്‍ പങ്കാളിത്ത നിരക്ക് ഈ നഗരത്തിനാണ്. കൂടാതെ, രാജ്യത്തെ മറ്റ് വന്‍ നഗരങ്ങളുമായി താരതമ്യം ചെയ്യുമ്പോള്‍, 1.8% മാത്രം തൊഴിലില്ലായ്മ നിരക്കോടുകൂടി ഏറ്റവും കുറവുള്ള നഗരവും ബംഗളൂരുവാണ്. വ്യത്യസ്ത ബിസിനസ്സ് മേഖലകളുടെ സാന്നിധ്യം ബംഗളൂരുവിന്റെ സാമ്പത്തിക പ്രൊഫൈൽ ശക്തമായി നിലകൊള്ളുന്നു. റിയല്‍ എസ്റ്റേറ്റ് മേഖലയിലുണ്ടായ തകര്‍പ്പന്‍ വളര്‍ച്ചയും ആഗോള നിക്ഷേപങ്ങളുടെയും സമര്‍ഥവുമായ പ്രതിഭകളുടെയും മുഖ്യ കേന്ദ്രമായ നഗരത്തിന്റെ പ്രശസ്തി വര്‍ധിച്ചതും ഈ മുന്നേറ്റത്തിന്റെ അടയാളങ്ങളാണ്.
ഹൈദരാബാദ്; ഇന്ത്യയിലെ ഏറ്റവും വേഗത്തില്‍ വളരുന്ന നഗരം
അതേസമയം, ഇന്ത്യയിലെ ഏറ്റവും വേഗത്തില്‍ വളരുന്ന നഗരമായി ഹൈദരാബാദ് പേരുകേട്ടിരിക്കുകയാണെന്ന് നൈറ്റ് ഫ്രാങ്ക് റിപ്പോര്‍ട്ടിൽ പറയുന്നു. ഹുറുണ്‍ ഇന്ത്യ റിച്ച് ലിസ്റ്റ് 2024 പ്രകാരം, ഹൈദരാബാദില്‍ 27 ശതകോടീശ്വരന്മാര്‍ ഉള്‍പ്പെടെ ആകെ 100 സമ്പന്ന വ്യക്തികളുണ്ട്. ബെംഗളൂരുവില്‍ ഇവരുടെ എണ്ണം കൂടുതലാണെങ്കിലും, സമ്പാദ്യത്തില്‍ സമാനമായ വളര്‍ച്ച ഹൈദരാബാദ് കാണിക്കുന്നു. ഉന്നത ഗുണമേന്മയുള്ള ഫിസിക്കല്‍ ഇന്‍ഫ്രാസ്ട്രക്ചര്‍, പ്രത്യേകിച്ച് വിപുലമായ മെട്രോ ശൃംഖലയും മെച്ചപ്പെട്ട ഹെല്‍ത്ത് കെയര്‍ സംവിധാനങ്ങളും ഹൈദരാബാദിനെ നിക്ഷേപകര്‍ക്കും താമസക്കാര്‍ക്കും ഒരു ആകര്‍ഷക കേന്ദ്രമാക്കി മാറ്റുന്നു.
റിയല്‍ എസ്റ്റേറ്റ് വളര്‍ച്ചയും ജീവിത നിലവാരവും
2023 ലെ കണക്കുകള്‍ പ്രകാരം, ഹൈദരാബാദിലെ വാസയോഗ്യമായ റിയല്‍ എസ്റ്റേറ്റ് വില 11% വര്‍ധിച്ചു, മുംബൈ-എംഎംആറില്‍ 7%, ബെംഗളൂരുവില്‍ 9%, ഡല്‍ഹിയില്‍ 6% എന്നിങ്ങനെയാണ് വര്‍ധനവിനുഭവപ്പെട്ടത്.
