ഗൃഹോപകരണ മേഖലയിൽ രാജസ്ഥാനിൽ 25% വാര്‍ഷിക വളര്‍ച്ചയെന്ന് ആമസോണ്‍
രാജസ്ഥാനിലെ ഗൃഹോപകരണ മേഖലയില്‍ 25 ശതമാനം വാര്‍ഷിക വളര്‍ച്ച കൈവരിച്ചതായി ആമസോണ്‍. പുതിയ ഉപഭോക്താക്കളില്‍ 15 ശതമാനം വര്‍ധനവുണ്ടായതായും കമ്പനിയുടെ പ്രസ്താവന അറിയിച്ചു.
‘ജീവിതശൈലിയിലെ നവീകരണം, സുസ്ഥിര ജീവിത പരിഹാരങ്ങള്‍ എന്നിവയ്ക്കുള്ള ആവശ്യകതയിലുണ്ടായ വര്‍ധനവാണ് ഈ വളര്‍ച്ചയ്ക്ക് കാരണമെന്ന്’ ആമസോണ്‍ ഇന്ത്യയുടെ ഹോം, കിച്ചണ്‍ ആന്‍ഡ് ഔട്ട്‌ഡോര്‍സ് ഡയറക്ടര്‍ കെ എന്‍ ശ്രീകാന്ത് പറഞ്ഞു.
‘ആധുനിക അടുക്കള സജ്ജീകരണങ്ങളും വീടുകളുടെ മേക്ക് ഓവറുകളും മുതല്‍ ഫിറ്റ്‌നസ്, ഇലക്ട്രിക് വാഹനങ്ങള്‍ എന്നിവയോടുള്ള വര്‍ദ്ധിച്ചുവരുന്ന താല്‍പ്പര്യം വരെയുള്ള ഈ മേഖലയില്‍ ശക്തമായ വളര്‍ച്ചയാണ് കാണുന്നത്. പ്രത്യേകിച്ച് ജയ്പൂരിന് അടുക്കള, വീട്, ഓട്ടോമോട്ടീവ്, ഫിറ്റ്‌നസ് വിഭാഗങ്ങളില്‍ ഇരട്ട അക്ക വളര്‍ച്ചയുണ്ട്,’ അദ്ദേഹം കൂട്ടിച്ചേര്‍ത്തു.
