ഒക്ടോബര്‍ മാസത്തിലെ റെക്കോര്‍ഡ് വില്‍പ്പനയ്ക്ക് പിന്നാലെ, വിവാഹ വിപണിയെ ലക്ഷ്യമിട്ട് മാരുതി സുസുക്കി
ഒക്ടോബർ മാസത്തിലെ വിൽപ്പന റെക്കോർഡുകൾ മറികടന്ന്, ഇന്ത്യയിലെ പ്രമുഖ വാഹന നിർമ്മാതാക്കളായ മാരുതി സുസുക്കി, ഇനി വിവാഹ സീസൺ ലക്ഷ്യമിടുന്നു.കഴിഞ്ഞ മാസം കമ്പനി 2,02,402 യൂണിറ്റ് കാറുകളുടെ റീട്ടെയിൽ വിൽപ്പനയാണ് നേടിയിരുന്നത്, ഇത് ഉത്സവ വിൽപ്പനാ കാലത്തെ ഏറ്റവും ഉയർന്ന ഒക്ടോബർ മാസത്തിലെ നേട്ടമാണ്. 2020 ഒക്ടോബറിലെ 1,91,476 യൂണിറ്റുകൾ എന്ന മുൻ റെക്കോർഡ് ഇതോടെ ഭേദിക്കപ്പെട്ടു.ഈ നവംബറിൽ ഇന്ത്യയിൽ ലക്ഷക്കണക്കിന് വിവാഹങ്ങൾ നടക്കുമെന്നാണ് കണക്കാക്കുന്നത്. ഇതുമായി ബന്ധപ്പെട്ട ബിസിനസ് തന്ത്രങ്ങൾ മാരുതി തയ്യാറാക്കിക്കഴിഞ്ഞു. ഈ പ്രാരംഭ പ്രവർത്തനങ്ങൾ ചില്ലറ വിൽപ്പനയിൽ വലിയ നേട്ടം നേടാൻ സഹായകരമാകുമെന്ന് മാരുതി സുസുക്കി ഇന്ത്യ ലിമിറ്റഡിന്റെ സീനിയർ മാർക്കറ്റിംഗ് ആൻഡ് സെയിൽസ് എക്സിക്യൂട്ടീവ് ഓഫീസർ പാർത്തോ ബാനർജി പറഞ്ഞു.ഉത്സവകാല വിൽപ്പനയുടെ പ്രവണത അടുത്ത കുറച്ച് മാസങ്ങൾക്കു കൂടി നിലനിർത്താൻ കമ്പനിയ്ക്ക് കഴിയുമോ എന്ന ചോദ്യത്തിന് മറുപടിയായാണ് അദ്ദേഹം ഇക്കാര്യം വ്യക്തമാക്കിയത്.ഈ വർഷത്തെ നവംബർ മാസം ചരിത്രത്തിലെ ഏറ്റവും കൂടുതലായ വിവാഹങ്ങൾ നടക്കും. ഇത് ഉത്സവ വിൽപ്പനക്ക് ആവശ്യമായ ഊർജ്ജം നൽകുമെന്നും, 2024 സാമ്പത്തിക വർഷത്തിൽ 4 മുതൽ 5 ശതമാനം വരെ വളർച്ച കൈവരിക്കുമെന്ന പ്രതീക്ഷയോടെയാണ് മാരുതി മുന്നേറുന്നത്.”ഏപ്രിൽ മുതൽ ഒക്ടോബർ വരെ, ചില്ലറ വിൽപ്പനയിൽ 4 ശതമാനത്തിന്റെ മൊത്തം വളർച്ചയുണ്ടായി. ഒക്ടോബർ മാസത്തിൽ മാത്രം 22.4 ശതമാനത്തിന്റെ വളർച്ചയും രേഖപ്പെടുത്തിയിട്ടുണ്ട്. ഇത് മുൻകൂട്ടി പ്രവചിച്ചതാണ്, 4 മുതൽ 5 ശതമാനം വരെയുള്ള വളർച്ച കൈവരിക്കാൻ ആണ് സാധ്യത,” ബാനർജി കൂട്ടിച്ചേർത്തു.ഒക്ടോബറിലെ മികച്ച വിൽപ്പനാ നേട്ടത്തിന് ശേഷം, വിൽപ്പന ശൃംഖലയിൽ നിന്നുള്ള ഇൻവെന്ററി കുറയ്ക്കാൻ മാരുതിയ്ക്ക് കഴിഞ്ഞതായി അദ്ദേഹം പറഞ്ഞു.”ഞങ്ങൾ 40,000 യൂണിറ്റുകളിൽ കൂടുതൽ സ്റ്റോക്ക് പുനഃക്രമീകരിച്ചു. ഉൽപ്പാദന വിതരണ ശൃംഖലയും ഞങ്ങൾ കൃത്യമായി മാനേജുചെയ്തു, ഇപ്പോൾ നമ്മുടെ നെറ്റ് വർക്ക് സ്റ്റോക്ക് ഏകദേശം ഒരു മാസത്തേക്കാണ്. 30 ദിവസത്തേക്കുള്ള സ്റ്റോക്ക് നിലയിൽ എത്തിക്കാൻ ഞങ്ങൾക്കായി,” ബാനർജി വ്യക്തമാക്കി.
