എയ്റോ ഇന്ത്യ 2025: യെലഹങ്ക എയര്‍ഫോഴ്സ് സ്റ്റേഷനില്‍ ആരംഭിച്ചു
എയ്റോ ഇന്ത്യ ഷോ 2025 ബെംഗളൂരുവിലെ യെലഹങ്ക എയര്‍ഫോഴ്സ് സ്റ്റേഷനില്‍ തുടങ്ങി. എയര്‍ പവറിന്റെയും ഇന്നൊവേഷന്റെയും പ്രദര്‍ശനത്തിന് സാക്ഷ്യം വഹിക്കുന്ന ഷോയുടെ സമാപന ചടങ്ങുകൾ 14നാണ്.രാജ്യത്തിന്റെ എയ്റോസ്പേസ്, പ്രതിരോധ മേഖലയിലെ നാഴികക്കല്ലായ പരിപാടി ആഗോള പ്രതിരോധ നേതാക്കള്‍, ഉന്നത വ്യോമയാന വിദഗ്ധര്‍, സാങ്കേതിക കണ്ടുപിടുത്തക്കാര്‍ എന്നിവരെ ഒരുമിച്ച് കൊണ്ടുവരും.വ്യവസായ പ്രൊഫഷണലുകള്‍ മുതല്‍ വ്യോമയാന പ്രേമികള്‍ വരെ ആയിരക്കണക്കിന് സന്ദര്‍ശകരെ ഷോ ആകര്‍ഷിക്കുമെന്ന് പ്രതീക്ഷിക്കുന്നു.
അമേരിക്കന്‍ എഫ്-35 ലൈറ്റ്നിംഗ് II, റഷ്യന്‍ എസ് യു-57 എന്നീ സ്റ്റെല്‍ത്ത് കഴിവുകളുള്ള ലോകത്തിലെ തന്നെ ഏറ്റവും അത്യാധുനിക അഞ്ചാം തലമുറ യുദ്ധവിമാനങ്ങളുടെ പങ്കാളിത്തത്തിന് ആദ്യമായി ‘എയ്റോ ഇന്ത്യ’ മെഗാ ഇവന്റ് സാക്ഷ്യം വഹിക്കും.ഇത് ആദ്യമായാണ് എയ്റോ ഇന്ത്യ എയര്‍ ഷോയില്‍ യുഎസ് എയര്‍ഫോഴ്സിന്റെ എഫ്-35 അഞ്ചാം തലമുറ യുദ്ധവിമാനം പങ്കെടുക്കുന്നത്.’15-ാം തവണയും, ഏഷ്യയിലെ പ്രധാന എയ്റോസ്പേസ്, ഡിഫന്‍സ് ട്രേഡ് ഷോ എക്സിബിഷനായ എയ്റോ ഇന്ത്യ 2025-ല്‍ പങ്കെടുക്കുന്നതില്‍ അമേരിക്ക അഭിമാനിക്കുന്നു. യുഎസും ഇന്ത്യയും തമ്മിലുള്ള ശക്തവും വളരുന്നതുമായ പ്രതിരോധ, എയ്റോസ്പേസ് പങ്കാളിത്തം ശക്തിപ്പെടുത്തി, നൂതനമായ നിരവധി വിമാനങ്ങളുടെ ശ്രേണി അമേരിക്ക ഇതിലൂടെ പ്രദര്‍ശിപ്പിക്കും,’ യുഎസ് എംബസിയുടെ പ്രസ്താവനയില്‍ വ്യക്തമാക്കി.
പ്രതിരോധ സംവിധാനങ്ങള്‍, സൈനിക വ്യോമയാനം, എയ്റോസ്പേസ് സാങ്കേതികവിദ്യ എന്നിവയിലെ ഏറ്റവും പുതിയ മുന്നേറ്റങ്ങള്‍ ഉള്‍ക്കൊള്ളിച്ച് വിപുലമായ ഒരു പ്രദര്‍ശനം തന്നെയാണ് പരിപാടിയില്‍ അവതരിപ്പിക്കുക. അടുത്ത തലമുറ യുദ്ധവിമാനങ്ങളും ഹെലികോപ്റ്ററുകളും മിസൈല്‍ പ്രതിരോധ സംവിധാനങ്ങളും മുതല്‍ ആളില്ലാ വിമാനങ്ങളും (യുഎവി) വരെ. പ്രദര്‍ശനം വ്യോമയുദ്ധത്തിന്റെ ഭാവിയിലേക്ക് ഒരു നേര്‍ക്കാഴ്ച നല്‍കും.തദ്ദേശീയമായ ലൈറ്റ് കോംബാറ്റ് എയര്‍ക്രാഫ്റ്റ് (തേജസ്), അഡ്വാന്‍സ്ഡ് ലൈറ്റ് ഹെലികോപ്റ്റര്‍ (ധ്രുവ്) തുടങ്ങിയവ ഷോയിലുണ്ടാകും. പ്രതിരോധ, വ്യോമയാന മേഖലകളിലെ വളര്‍ന്നുവരുന്ന സംരംഭകര്‍ക്ക് മികച്ച സാങ്കേതികവിദ്യകള്‍ പ്രദര്‍ശിപ്പിക്കാനും നിക്ഷേപകരുമായി ഇടപഴകാനും വ്യവസായ പ്രമുഖരുമായി സഹകരിക്കാനും ഈ വേദിയിലൂടെ സാധിക്കും.
പ്രതിരോധ മന്ത്രിമാരുടെ കോണ്‍ക്ലേവാണ് ഇവന്റിലെ ഏറ്റവും പ്രധാനപ്പെട്ട ഒത്തുചേരലുകളില്‍ ഒന്ന്, അവിടെ നേതാക്കള്‍ ആഗോള സുരക്ഷാ ചലനാത്മകത, തന്ത്രപരമായ സഹകരണം, പ്രതിരോധ പങ്കാളിത്തം എന്നിവയെക്കുറിച്ച് ചര്‍ച്ച ചെയ്യും. പുതിയ അന്താരാഷ്ട്ര പ്രതിരോധ കരാറുകള്‍ക്കും സാങ്കേതികവിദ്യ പങ്കിടല്‍ സംരംഭങ്ങള്‍ക്കും ഈ ഉന്നതതല യോഗം വഴിയൊരുക്കും.
