‘ദി ഫാൻ്റം ഓഫ് ദി ഓപ്പറ’ ഇന്ത്യയിൽ അരങ്ങേറ്റത്തിന്, നിത മുകേഷ് അംബാനി കൾച്ചറൽ സെൻ്ററിൽ മാർച്ച് മുതൽ
ആൻഡ്രൂ ലോയ്ഡ് വെബ്ബറിൻ്റെ ‘ദി ഫാൻ്റം ഓഫ് ദി ഓപ്പറ’ നാടകം ഇന്ത്യയിൽ അരങ്ങേറുന്നു. നിത മുകേഷ് അംബാനി കൾച്ചറൽ സെൻ്ററിൽ 2025 മാർച്ച് 5 മുതലാണ് നാടകം അവതരിപ്പിക്കപ്പെടുക. നിത മുകേഷ് അംബാനി കൾച്ചറൽ സെൻ്റർ തുറന്ന് രണ്ട് വർഷത്തിനുശേഷമാണ് ‘ദി ഫാൻ്റം ഓഫ് ദി ഓപ്പറ’ എത്തുന്നത്. ഗാസ്റ്റൺ ലെറോക്‌സിൻ്റെ 1910 ലെ നോവലായ ലെ ഫാൻ്റം ഡി എൽ ഓപ്പറയെ അടിസ്ഥാനമാക്കി നിർമ്മിച്ച ‘ദി ഫാൻ്റം ഓഫ് ദി ഓപ്പറ’ , പാരീസ് ഓപ്പറ ഹൗസിന് കീഴിൽ ഒളിച്ചിരിക്കുന്ന, അതിൽ വസിക്കുന്ന എല്ലാവരുടെയും മേൽ ഭീകര ഭരണം നടത്തുന്ന, നിഗൂഢമായ മുഖംമൂടി ധരിച്ച ഒരു വ്യക്തിയുടെ കഥ പറയുന്നു.
അസൂയ, ഭ്രാന്ത്, അഭിനിവേശം എന്നിവ കൂട്ടിമുട്ടുന്ന സംഭവങ്ങളാണ് നാടകത്തിലുള്ളത്. ആൻഡ്രൂ ലോയ്ഡ് വെബ്ബറിൻ്റെ ‘ദി ഫാൻ്റം ഓഫ് ദി ഓപ്പറ’ ലോകത്തിലെ ഏറ്റവും മനോഹരവും ഗംഭീരവുമായ സൃഷ്ടികളിലൊന്നായി കണക്കാക്കപ്പെടുന്നു, 195 നഗരങ്ങളിലായി 21 ഭാഷകളിലായി 160 ദശലക്ഷത്തിലധികം ആളുകളിലേക്ക് ഈ മാസ്റ്റർ പീസ് ഇതിനകം എത്തിയിട്ടുണ്ട്. 1986 ഒക്ടോബർ 9-ന് ലണ്ടനിലെ വെസ്റ്റ് എൻഡിലെ ഹെർ മജസ്റ്റിസ് തിയേറ്ററിൽ പ്രീമിയർ ചെയ്യുകയും 1988 ജനുവരി 26-ന് ബ്രോഡ്‌വേയിൽ മജസ്റ്റിക് തിയേറ്ററിൽ അരങ്ങേറ്റം കുറിക്കുകയും ചെയ്ത ‘ദി ഫാൻ്റം ഓഫ് ദി ഓപ്പറ’ 70-ലധികം പ്രധാന നാടക അവാർഡുകൾ നേടിയിട്ടുണ്ട്.
2006 ജനുവരി 9-ന്, 7,486-ാമത്തെ പ്രകടനത്തോടെ ബ്രോഡ്‌വേയുടെ ചരിത്രത്തിലെ ഏറ്റവും ദൈർഘ്യമേറിയ ഷോയായി ഇത് മാറി. ‘ദി ഗ്രേറ്റ് ഇന്ത്യൻ മ്യൂസിക്കൽ: സിവിലൈസേഷൻ ടു നേഷൻ’ പോലുള്ള ബ്ലോക്ക്ബസ്റ്റർ ഷോകളിലൂടെയും ‘ദ സൗണ്ട് ഓഫ് മ്യൂസിക്’, ‘മമ്മ മിയ!’, ‘മറ്റിൽഡ ദ മ്യൂസിക്കൽ’, ‘ലൈഫ് ഓഫ് പൈ’ തുടങ്ങിയ ജനപ്രിയ അന്താരാഷ്ട്ര നാടകങ്ങളും നിത മുകേഷ് അംബാനി കൾച്ചറൽ സെൻ്റർ ഇന്ത്യൻ പ്രേക്ഷകരിലേക്ക് ഇതിനോടകം എത്തിച്ചിട്ടുണ്ട്.
