റബര്‍ ഇറക്കുമതിയിലൂടെ വിപണിയിലെ തകര്‍ച്ച: ആഭ്യന്തര റബർ കര്‍ഷകരുടെ ഭാവി അനിശ്ചിതത്വത്തില്‍
ഇറക്കുമതി കൂട്ടിയതോടെ ആഭ്യന്തര വിപണിയില്‍ നിന്ന് മാറിനില്‍ക്കുന്ന ടയര്‍ കമ്പനികളുടെ സമീപനത്തിനെതിരെ റബര്‍ ബോര്‍ഡ് രംഗത്ത്. ടയർ കമ്പനികൾ ഉൾപ്പടെ റബര്‍ മേഖലയുമായി പ്രവര്‍ത്തിക്കുന്നവരുമായി നടത്തിയ യോഗത്തിലാണ് റബര്‍ ബോര്‍ഡ് എക്‌സിക്യൂട്ടീവ് ഡയറക്ടര്‍ എം. വസന്തഗേശന്‍ ഈ വിഷയം ഉന്നയിച്ചത്. ദീര്‍ഘകാല വിളയായ റബറിന്റെ വിലത്തകര്‍ച്ചയും അതില്‍ ഉണ്ടാകുന്ന അനിശ്ചിതത്വവും മേഖലയുടെ ഭാവിക്ക് യോജിച്ചതല്ലെന്നും, കോമ്പൗണ്ടഡ് റബറിന്റെ അതിരുകടന്ന ഇറക്കുമതി റബര്‍ വ്യവസായത്തെ ബാധിക്കുമെന്നും അദ്ദേഹം അഭിപ്രായപ്പെട്ടു. ഇതുസംബന്ധിച്ച് ഒരു റിപ്പോര്‍ട്ട് കേന്ദ്രസര്‍ക്കാരിന് സമര്‍പ്പിക്കുമെന്നും റബര്‍ ബോര്‍ഡ് അറിയിച്ചു.റബര്‍ വില ഇനിയും കുറഞ്ഞാല്‍ കര്‍ഷകര്‍ ടാപ്പിംഗില്‍ നിന്ന് പിന്തിരിയുമെന്ന് യോഗത്തില്‍ പങ്കെടുത്തവര്‍ മുന്നറിയിപ്പു നല്‍കി. ഇതു കാരണം ടയര്‍ നിര്‍മാതാക്കളുടെയും വ്യവസായത്തിന്റെയും സ്വാധീനത്തിന് ഒരു പ്രതിസന്ധി ഉണ്ടാകുമെന്നും റബര്‍ ബോര്‍ഡ് വ്യക്തമാക്കി. ആഭ്യന്തര വിപണിയുടെ നിലനില്‍പ്പിന് താല്‍പര്യമുള്ള ഇടപെടലുകള്‍ നടത്തണമെന്നും ബോര്‍ഡ് ആവശ്യപ്പെട്ടു.180 രൂപയില്‍ താഴെയായതോടെ ചില ഇടത്തരം തോട്ടങ്ങളില്‍ ടാപ്പിംഗ് നിർത്തിയിരിക്കുകയാണ്. വില കൂടിയ സമയത്ത് വര്‍ധിപ്പിച്ച കൂലിക്ക് അനുസൃതമായ വരുമാനം ലഭിക്കാത്തതാണ് കര്‍ഷകര്‍ നേരിടുന്ന ഒരു പ്രധാന പ്രശ്നം. കൂടാതെ വില ഉയര്‍ന്ന കാലത്ത് വായ്പയെടുത്തും മറ്റ് സാമ്പത്തിക സഹായങ്ങളുമെടുത്ത് തോട്ടങ്ങള്‍ മെച്ചപ്പെടുത്തുന്നവര്‍ക്കും കടബാധ്യതയും സാമ്പത്തിക ബാധ്യതയും മൂര്‍ച്ഛിച്ചിരിക്കുകയാണ്.കോട്ടയത്ത് റബര്‍ ബോര്‍ഡ് നിശ്ചയിച്ച നിലവിലെ വില 183 രൂപയാണ്, എന്നാൽ ചെറുകിട വ്യാപാരികള്‍ പലവട്ടവും 10 രൂപ കുറച്ചാണ് റബര്‍ ശേഖരിക്കുന്നത്. ഇത് തുടരുകയാണെങ്കില്‍ റബര്‍ വില 150 രൂപയില്‍ താഴെയാകുമെന്ന ആശങ്ക വിദഗ്ധര്‍ പങ്കുവെക്കുന്നു.
