‘ഫസ്റ്റ് കം ഫസ്റ്റ് സര്‍വീസ്’ ജനപ്രിയ നടപടികളുമായി മോട്ടോര്‍ വാഹന വകുപ്പ്
മോട്ടോര്‍ വാഹന വകുപ്പ് പുതിയ ജനപ്രിയ നടപടികളുമായി ഓണ്‍ലൈന്‍ സേവനങ്ങളെ പരിഷ്കരിച്ചിട്ടുണ്ട്. സി.എച്ച്. നാഗരാജു ട്രാന്‍സ്‌പോര്‍ട് കമ്മിഷണറായി ചുമതലയേറ്റതിനു പിന്നാലെ, ബാഹ്യ ഇടപെടലുകള്‍ ഒഴിവാക്കി ‘ഫസ്റ്റ് കം, ഫസ്റ്റ് സര്‍വീസ്’ സംവിധാനം ശക്തിപ്പെടുത്തിയിട്ടുണ്ട്. ഇതിലൂടെ ആദ്യമായി അപേക്ഷിക്കുന്നവര്‍ക്ക് മുന്‍ഗണനാപൂര്‍വം സേവനം ലഭ്യമാക്കാന്‍ പരിഷ്കാരം നടപ്പാക്കുകയായിരുന്നു.ഇതിന്റെ ഭാഗമായി 11 ഓണ്‍ലൈന്‍ സേവനങ്ങള്‍ സാരഥി പോര്‍ട്ടലില്‍ FCFS സംവിധാനവുമായി സംയോജിപ്പിച്ചിരിക്കുന്നു. ലേണേഴ്സ് ലൈസന്‍സ് പുതുക്കല്‍, ഡ്രൈവിങ് ലൈസന്‍സിന്‍റെ പകര്‍പ്പ്, ഡ്യൂപ്ലിക്കേറ്റ് ലൈസന്‍സ് എന്നിവ ഉള്‍പ്പെടെ നിരവധി സേവനങ്ങള്‍ ഇതിനകം ഈ സംവിധാനത്തിലേക്ക് കൊണ്ടുവന്നിട്ടുണ്ട്. കൂടാതെ, ലൈസന്‍സില്‍ പേര്, വിലാസം, ഫോട്ടോ, ഒപ്പ് തുടങ്ങിയവ മാറ്റുക, കണ്ടക്ടര്‍ ലൈസന്‍സ് പുതുക്കല്‍, ഇന്‍റര്‍നാഷണല്‍ ഡ്രൈവിങ് പെര്‍മിറ്റ് ലഭ്യമാക്കല്‍, ഡ്രൈവിങ് ലൈസന്‍സിലെ ക്ലാസ് ഓഫ് വെഹിക്കിള്‍ സറണ്ടര്‍ തുടങ്ങിയ സേവനങ്ങളും ഇതിലൂടെ ലഭ്യമാകും.മൊത്തത്തില്‍ മോട്ടോര്‍ വാഹന വകുപ്പിന്‍റെ ഓണ്‍ലൈന്‍ സേവനങ്ങള്‍ എളുപ്പമാക്കിയിരുന്നെങ്കിലും, ഇപ്പോഴാണ് ‘ഫസ്റ്റ് കം, ഫസ്റ്റ് സര്‍വീസ്’ അടിസ്ഥാനത്തില്‍ ഒരു കൃത്യമായ മാനദണ്ഡം നിശ്ചയിച്ചിരിക്കുന്നത്. അതോടൊപ്പം, ഇനി നടക്കുന്ന വര്‍ഷങ്ങളില്‍ കൂടുതല്‍ സുതാര്യതയും ജനകീയ പരിപാടികളും അവതരിപ്പിക്കുമെന്ന് അധികൃതര്‍ അറിയിച്ചു.
