ഇന്ത്യൻ സമ്പദ്‌വ്യവസ്ഥ 2030- ഓടെ ഇരട്ടിയാകും: നീതി ആയോഗ് സിഇഒ
2030 ഓടെ ഇന്ത്യയുടെ സമ്പദ്‌വ്യവസ്ഥ ഇരട്ടിയാകുമെന്ന് നീതി ആയോഗ് സിഇഒ ബിവിആർ സുബ്രഹ്മണ്യം പറഞ്ഞു. രാജ്യത്തിന്റെ വളർച്ചയ്ക്കായി നഗരവികസനവും അടിസ്ഥാന സൗകര്യങ്ങളും നിർണായകമാണെന്ന് അദ്ദേഹം ഊന്നിപ്പറഞ്ഞു.സാങ്കേതികവിദ്യയുടെ പ്രയോജനങ്ങൾ ഇന്ത്യയ്ക്ക് മികച്ച സാധ്യതകളാണ് തുറക്കുന്നതെന്ന് സൂചിപ്പിച്ച അദ്ദേഹം, 2027 ഓടെ ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയാകാനുള്ള ഇന്ത്യയുടെ ലക്ഷ്യം സാധ്യമാക്കാൻ ശക്തമായ തന്ത്രങ്ങൾ ആവശ്യമാണെന്നും വ്യക്തമാക്കി.ഇപ്പോൾ ഏകദേശം 3.7 ട്രില്യൺ യുഎസ് ഡോളർ വലുപ്പമുള്ള ഇന്ത്യ, ലോകത്തിലെ അഞ്ചാമത്തെ വലിയ സമ്പദ്‌വ്യവസ്ഥയായി തുടരുകയാണെന്നും 2047 ഓടെ ഇന്ത്യ ആഗോള തലത്തിൽ കൂടുതൽ പ്രാധാന്യം നേടുമെന്നും അദ്ദേഹം പറഞ്ഞു.2047 ഓടെ ഇന്ത്യ ജനസംഖ്യാശാസ്‌ത്രപരമായി ഏറ്റവും പ്രായം കുറഞ്ഞ രാജ്യങ്ങളിൽ ഒന്നായി മാറുകയും, പ്രതിശീർഷ വരുമാനം 18,000 മുതൽ 20,000 ഡോളർ വരെയാകുമെന്നും സുബ്രഹ്മണ്യം കൂട്ടിച്ചേർത്തു.പ്രകൃതി ദുരന്തങ്ങളും ദാരിദ്ര്യവും പോലുള്ള വെല്ലുവിളികളെ മറികടക്കുന്നതിൽ കഴിഞ്ഞ ദശകത്തിലെ പുരോഗതി നോക്കുമ്പോൾ, ഇന്ത്യ ഗണ്യമായ ആഗോള സാമ്പദ്‌വ്യവസ്ഥയായി ഉയരുമെന്ന് പ്രതീക്ഷിക്കുന്നതായും, നഗരങ്ങൾ രാജ്യത്തിന്റെ സാമ്പത്തിക വളർച്ചയെ നയിക്കുന്ന കേന്ദ്രങ്ങളായി മാറുമെന്നും അദ്ദേഹം വ്യക്തമാക്കി.
