ഇസ്രായേലി കമ്പനിയുമായി അദാനി ഗ്രൂപ്പിന്റെ വമ്പൻ കരാര്‍; 83,947 കോടി രൂപയുടെ നിക്ഷേപം ഇന്ത്യയിലേക്ക്
മുംബൈ: ഇസ്രായേലി ചിപ്പ് ഫാബ്രിക്കേഷൻ കമ്പനിയായ ടവർ സെമി കണ്ടക്ടറുമായി അദാനി ഗ്രൂപ്പ് പങ്കാളിത്തം ആരംഭിച്ചു. ഇന്ത്യയിൽ ഒരു ചിപ്പ് ഫാബ്രിക്കേഷൻ യൂണിറ്റ് സ്ഥാപിക്കാൻ ടവർ സെമി കണ്ടക്ടർ കേന്ദ്ര സർക്കാരിന് അപേക്ഷ നൽകിയിരുന്നു, പക്ഷേ ഒരു ഇന്ത്യൻ പങ്കാളിയുമായി ചേർന്നാണ് ഇത് തുടങ്ങേണ്ടത് എന്ന സർക്കാർ നിർദ്ദേശത്തെ തുടർന്ന് അദാനി ഗ്രൂപ്പിനൊപ്പം ചേർന്നതാണ്. മഹാരാഷ്ട്രയിലെ പനവേലിലെ തലോജ ഐഎംഡിസിയിൽ ഈ വ്യവസായ യൂണിറ്റിന് അംഗീകാരം നൽകിയതായി മഹാരാഷ്ട്ര സർക്കാർ അറിയിച്ചു.ആകെ 83,947 കോടി രൂപയുടെ നിക്ഷേപം ഉള്ള ഈ പ്രോജക്ടിന് സർക്കാർ അംഗീകാരം ലഭിച്ചു. ഇതോടൊപ്പം മഹാരാഷ്ട്രയിൽ പുതിയ തൊഴിലവസരങ്ങൾ സൃഷ്ടിക്കുന്ന മൂന്ന് വ്യവസായ പദ്ധതികൾക്ക് മന്ത്രിസഭയുടെ അനുമതിയും ലഭിച്ചു. മഹാരാഷ്ട്ര മുഖ്യമന്ത്രി ഏകനാഥ് ഷിൻഡെയുടെ പ്രസ്താവനപ്രകാരം, 1,20,220 കോടി രൂപയുടെ മൊത്തം നിക്ഷേപം ഈ മൂന്ന് പ്രോജക്റ്റുകൾ വഴി സംസ്ഥാനത്ത് എത്തും. ഇതുവഴി 14,800 പേരുടെ തൊഴിലവസരം ഉണ്ടാകുമെന്നും അദ്ദേഹം കൂട്ടിച്ചേർത്തു. പൂനയിലുള്ള സ്കോഡയുടെ ഹൈബ്രിഡ് വാഹന നിർമ്മാണ ഫാക്ടറി, ഛത്രപതി സമ്പാജി നഗറിലെ ടയോട്ട കിർലോസ്കറിന്റെ ഹൈബ്രിഡ് ഇലക്ട്രിക് വാഹന ഫാക്ടറി എന്നിവയാണ് മറ്റ് പ്രധാന വ്യവസായ പദ്ധതികൾ.
