എന്നാല്ലും എന്റെ മുല്ലേ!കിലോയ്ക്ക് അയ്യായിരം രൂപ കടന്ന് മുല്ലപ്പൂ
കൊച്ചി: കുതിച്ചുയര്ന്ന് മുല്ലപ്പൂ വില. 3,000 രൂപയ്ക്ക് മുകളിലാണ് വെറും രണ്ടാഴ്ചയ്ക്കിടെ മുല്ലപ്പൂ വിലയുയര്ന്നത്. നിലവില് കിലോയ്ക്ക് 4,000 രൂപയും കടന്ന് കുതിക്കുകയാണ് മുല്ലപ്പൂ വില.രണ്ടാഴ്ച മുന്പ് 1,000 രൂപയായിരുന്നു വില. മുഹൂര്ത്ത നാളുകളില് വില വീണ്ടും കൂടുന്നുണ്ട്.
ഞായറാഴ്ച 5,500 രൂപയ്ക്ക് വരെയാണ് ഒരു കിലോ മുല്ലപ്പൂ വിറ്റുപോയതെന്നും സാധാരണ ദിവസങ്ങളില് 3,500-4,000 രൂപ വരെ വിലയുണ്ടെന്നും വ്യാപാരികള് പറയുന്നു.തമിഴ്നാട്ടിലെ കനത്ത മഴയും കേരളത്തില് മഞ്ഞുവീഴ്ച നേരത്തെ ആരംഭിച്ചതുമാണ് മുല്ലപ്പൂ ഉല്പ്പാദനത്തെ ഇത്രയുമതികം ബാധിച്ചത്.
തമിഴ്നാട്ടിലെ സത്യമംഗലം, കോയമ്പത്തൂര്, നരക്കോട്ട തുടങ്ങിയിടങ്ങളിൽ നിന്നാണ് പ്രധാനമായും മുല്ലപ്പൂവെത്തുന്നത്. പാലക്കാട്ടെ അതിര്ത്തി പഞ്ചായത്തായ വടകരപ്പതിയിലടക്കം പ്രാദേശികമായി കുറ്റിമുല്ല കൃഷി ചെയ്യുന്നവരുമുണ്ട്.
സാധാരണ ഡിസംബര് പകുതിയോടെ കാണാറുള്ള മഞ്ഞുവീഴ്ച, നവംബര് ആദ്യവാരം തന്നെയെത്തിയത് ഉല്പ്പാദനത്തെ ബാധിച്ചെന്ന് കര്ഷകര് വ്യക്തമാക്കി. ചൂടുള്ള കാലാവസ്ഥയിലാണ് മുല്ലപ്പൂ തഴച്ചുവളരുന്നത്. മഞ്ഞുവീഴ്ചയില് പൂവ് മൊട്ടിടുന്നത് കുറയും.
