നന്ദിനി പാൽ വില കൂട്ടി; ഇനി എല്ലാ പാക്കറ്റുകളിലും 50 മില്ലി പാൽ അധികം; പുതിയ തീരുമാനങ്ങളുമായി കർണാടക

ബെംഗളൂരു: കർണാടകത്തിൽ നന്ദിനി പാലിൻ്റെ വില കൂട്ടി. ലിറ്ററിന് രണ്ട് രൂപയാണ് കൂട്ടിയത്. കർണാടക മിൽക്ക് ഫെഡറേഷൻ്റേതാണ് തീരുമാനം. സംസ്ഥാനത്ത് ഇന്ധനവില കൂട്ടിയതിന് പിന്നാലെയാണ് പാൽ വിലയിലും വർധന ഉണ്ടായിരിക്കുന്നത്. ജൂൺ 26 മുതൽ പുതുക്കിയ നിരക്കിലാകും പാൽ വിൽപന നടക്കുക. അതേസമയം ജൂൺ 26 മുതൽ ഓരോ പാക്കറ്റിലും 50 മില്ലി പാൽ അധികമായി ഉൾപ്പെടുത്തുമെന്നും കർണാടക മിൽക്ക് ഫെഡറേഷൻ അറിയിച്ചു.നിലവിലെ വിളവെടുപ്പ് കാലമായതിനാൽ എല്ലാ ജില്ലാ മിൽക്ക് യൂണിയനുകളിലും പാലിൻ്റെ സംഭരണം അനുദിനം വർധിച്ചു വരികയാണെന്ന് കർണാടക മിൽക്ക് ഫെഡറേഷൻ വാർത്താക്കുറിപ്പിൽ അറിയിച്ചു. നിലവിലെ സംഭരണം ഒരു കോടി ലിറ്ററിന് അടുത്താണ്. ഈ സാഹചര്യത്തിലാണ് ലിറ്ററിന് രണ്ട് രൂപ വീതം കൂട്ടാൻ തീരുമാനിച്ചതെന്നും ഫെഡറേഷൻ വിശദീകരിച്ചു. ഓരോ അര ലിറ്റർ (500 എംഎൽ), ഒരു ലിറ്റർ (1000 എംഎൽ) പാക്കറ്റുകളിലും 50 മില്ലി പാൽ അധികമായി ഉപഭോക്താക്കൾക്ക് നൽകുമെന്നും കർണാടക മിൽക്ക് ഫെഡറേഷൻ അറിയിച്ചു.നിലവിൽ അര ലിറ്റർ നന്ദിനി പാലിന് 22 രൂപയാണ് നിരക്ക്. പുതിയ പ്രഖ്യാപനം അനുസരിച്ച്, അര ലിറ്റർ പാൽ പാക്കറ്റിൽ 50 എംഎൽ പാൽ അധികമായി ഉണ്ടാകും. 550 എംഎൽ പാൽ 24 രൂപ നിരക്കിലായിരിക്കും വിൽപന നടത്തുക. ഒരു ലിറ്റർ പാൽ പാക്കറ്റിന് 42 രൂപയായിരുന്നു നിരക്ക്. പുതുക്കിയ നിരക്ക് പ്രകാരം, 1050 മില്ലിലിറ്റർ പാലിന് 44 രൂപയാകും. നന്ദിനിയുടെ മറ്റ് പാൽ വിഭാഗങ്ങൾക്കും വില വർധന ബാധകമാണ്. അതേസമയം തൈര്, മോര് തുടങ്ങിയ മറ്റ് ഉത്പന്നങ്ങൾക്ക് വില വർധനയില്ല.കഴിഞ്ഞ വർഷം ജൂലൈയിൽ നന്ദിനി പാൽ ലിറ്ററിന് മൂന്നു രൂപ കർണാടക മിൽക്ക് ഫെഡറേഷൻ കൂട്ടിയിരുന്നു. ലിറ്ററിന് അഞ്ച് രൂപ കൂട്ടണമെന്നായിരുന്നു ഫെഡറേഷൻ്റെ ആവശ്യമെങ്കിലും മൂന്ന് രൂപ വർധിപ്പിക്കാനാണ് സർക്കാർ അനുമതി നൽകിയത്. ക്ഷീര വ്യവസായത്തിൽ രാജ്യത്ത് രണ്ടാം സ്ഥാനത്താണ് കർണാടക കോപ്പറേറ്റീവ് മിൽക്ക് പ്രൊഡ്യൂസേഴ്സ് ഫെഡറേഷൻ. സംസ്ഥാനത്തെ 27 ലക്ഷം ക്ഷീര കർഷകരിൽ നിന്നാണ് ഫെഡറേഷൻ പാൽ സംഭരിക്കുന്നത്.