യുപിഐ ഇടപാടുകളില്‍ അടിമുടി മാറ്റം വരുന്നു
യുപിഐ ചട്ടങ്ങളില്‍ മാറ്റം വരുത്താനൊരുങ്ങി നാഷണല്‍ പേയ്മെന്റ് കോർപറേഷൻ ഓഫ് ഇന്ത്യ (എൻപിസിഐ). ഉപയോക്താക്കള്‍ക്ക് ഓഗസ്റ്റ് 1 മുതല്‍ പുതിയ ചട്ടങ്ങള്‍ ബാധകമാകും.രാജ്യത്തെ യുപിഐ ഇടപാടുകളുടെ വിശ്വാസ്യത, സുരക്ഷ, വേഗം തുടങ്ങിയവ വർദ്ധിപ്പിക്കുകയെന്ന ലക്ഷത്തോടെയാണ് പുതിയ മാറ്റങ്ങള്‍ കൊണ്ടുവരുന്നതെന്നാണ് എൻപിസിഐ വ്യക്തമാക്കുന്നത്. ഫോണ്‍ പേ,പേടിഎം, ഗൂഗിള്‍ പേ ഉള്‍പ്പെടെയുള്ള പേയ്മെന്റ് ആപ്പുകള്‍ ഉപയോഗിക്കുന്നവർക്ക് പുതിയ ചട്ടങ്ങള്‍ ബാധകമാകും. പുതിയ മാറ്റങ്ങള്‍ പ്രാബല്യത്തില്‍ വരുന്നതോടെ പേയ്മെന്റുകള്‍ നടത്തുന്നത്, ഓട്ടോ പേ, ബാലൻസ് പരിശോധന തുടങ്ങിയവയിൽ ഉള്‍പ്പെടെ മാറ്റങ്ങളുണ്ടാകും.
ഫോണ്‍ നമ്പറുമായി ലിങ്ക് ചെയ്ത ബാങ്ക് അക്കൗണ്ടുകള്‍ ഉപയോക്താക്കള്‍ക്ക് ഒരു ദിവസം 25 തവണയില്‍ കൂടുതല്‍ കാണാൻ കഴിയില്ല, ബാലൻസ് പരിശോധിക്കാൻ ഒരു ദിവസം 50 തവണ മാത്രമെ കഴിയൂ. ഉപയോക്താക്കള്‍ക്ക് ഒരു ഇടപാടിന്റെ പേയ്മെന്റ് സ്റ്റാറ്റസ് മൂന്ന് തവണ മാത്രമേ പരിശോധിക്കാൻ കഴിയൂ, കുറഞ്ഞത് 90 സെക്കൻഡ് ഇടവേളയിലേ സ്റ്റാറ്റസ് കാണാൻ കഴിയൂ. വിവിധ പ്ലാറ്റ്ഫോമുകളിലെ ഓട്ടോപേ ഇടപാടുകള്‍ക്ക് നിശ്ചിത സമയപരിധി നല്‍കുന്നതടക്കമാണ് മാറ്റങ്ങള്‍. യുപിഐ ആപ്പുകളില്‍ സൈബർ തട്ടിപ്പുകള്‍ കൂടി വരുന്ന സാഹചര്യത്തിലാണ് പുതിയ മാറ്റങ്ങള്‍ എൻപിസിഐ കൊണ്ടുവരുന്നത്.
