ബജാജ് ഫിനാൻസിന്റെ അറ്റാദായത്തിൽ 18% വളർച്ച; മൊത്തം വരുമാനം 18,058 കോടി
ഡിസംബർ പാദത്തിൽ ബജാജ് ഫിനാൻസിന്റെ സംയോജിത അറ്റാദായം 18 ശതമാനം വർധിച്ച് 4,308 കോടി രൂപയായി. 2023 ഡിസംബർ പാദത്തിൽ ഇത് 3,639 കോടി രൂപയായിരുന്നു. നിലവിലെ സാമ്പത്തിക വർഷത്തിന്റെ മൂന്നാം പാദത്തിൽ കമ്പനിയുടെ മൊത്തം വരുമാനം 18,058 കോടി രൂപയായി ഉയർന്നപ്പോൾ, കഴിഞ്ഞ വർഷം ഇതേ കാലയളവിൽ വരുമാനം 14,166 കോടി രൂപയായിരുന്നു. 2024 ഡിസംബർ അവസാനം ബജാജ് ഫിനാൻസിന്റെ സംയോജിത ആസ്തികൾ 28 ശതമാനം ഉയർന്നു. മുൻവർഷത്തെ 3,10,968 കോടിയുമായി താരതമ്യം ചെയ്യുമ്പോൾ 3,98,043 കോടി രൂപയിലേക്ക് എത്തിയതാണ്. അറ്റപലിശ വരുമാനവും 7,655 കോടി രൂപയിൽ നിന്ന് 9,382 കോടി രൂപയായി വർധിച്ചു. അതേസമയം, മൊത്ത നിഷ്ക്രിയ ആസ്തി (NPA) 0.95 ശതമാനത്തിൽ നിന്ന് 1.12 ശതമാനമായി ഉയർന്നു. അറ്റ നിഷ്ക്രിയ ആസ്തിയും 0.37 ശതമാനത്തിൽ നിന്ന് 0.48 ശതമാനമായി വർദ്ധിച്ചു.
