200 എംപി ക്യാമറയുമായി സാംസങ് ഗ്യാലക്സി എസ്25 സ്ലിം; 2025 ലെ ലോഞ്ച് വിവരങ്ങൾ പുറത്ത്
ദില്ലി: ദക്ഷിണ കൊറിയയിലെ പ്രമുഖ ഇലക്ട്രോണിക്‌സ് ബ്രാൻഡായ സാംസങ്, അതിന്റെ പുതിയ ഫ്ലാഗ്ഷിപ്പ് സ്മാർട്ട്ഫോൺ സീരീസ് ഗ്യാലക്സി എസ്25ന്റെ വിശദാംശങ്ങൾ പുറത്ത് വിട്ടു. സീരീസിൽ “ഗ്യാലക്സി എസ്25 സ്ലിം” എന്ന മോഡലും ഉണ്ടാകും. ഫോണിന്റെ ക്യാമറ സവിശേഷതകളും ലോഞ്ച് സമയവും ഇപ്പോൾ പരസ്യമായി.റിപ്പോർട്ടുകൾ പ്രകാരം ഗ്യാലക്സി എസ്25 സീരീസ് 2025 ജനുവരിയിൽ ആഗോള വിപണിയിൽ എത്തുമെന്നാണ് പ്രതീക്ഷ. എന്നാൽ, എസ്25 സ്ലിം മോഡൽ പിന്നീട് വിപണിയിലെത്തുമെന്നാണ് സൂചന. പുതിയ മോഡലിന്റെ ട്രിപ്പിൾ-ക്യാമറ സെറ്റപ്പിന്റെ വിവരങ്ങളാണ് പുറത്തുവന്നത്. അതിന്റെ പ്രധാന ക്യാമറ 200 മെഗാപിക്‌സൽ ഐസോസെൽ എച്ച്‌പി5 സെൻസറായിരിക്കുമെന്നും, കൂടാതെ 50 എംപിയുടെ ഐസോസെൽ ജെഎൻ5 സെൻസറുകൾ അൾട്രാ-വൈഡ്, ടെലിഫോട്ടോ ലെൻസുകൾക്ക് ലഭ്യമാകുമെന്നും ടിപ്‌സ്റ്റർ സഞ്ജയ് ചൗധരി പറയുന്നു. സാംസങിന്റെ പുതിയ ഓൾ ലെൻസസ് പ്രിസം (ALoP) സാങ്കേതികവിദ്യ ഈ മോഡലിൽ ഉപയോഗിച്ചിരിക്കുമെന്ന് റിപ്പോർട്ടുണ്ട്. സാംസങ് ഗ്യാലക്സി എസ്25 സ്ലിം 2025ന്റെ രണ്ടാം പാദത്തിൽ ഇന്ത്യയിൽ ലോഞ്ച് ചെയ്യുമെന്നാണ് പ്രതീക്ഷ. ഏപ്രിൽ മുതൽ ജൂൺ മാസങ്ങൾക്കിടെയാകും ഈ ഫോണിന്റെ ഇന്ത്യൻ വിപണിയിലെ അരങ്ങേറ്റം. അതേസമയം, 2025ൽ തന്നെ ആപ്പിള്‍ ഐഫോൺ 17 സീരീസുമായി സ്ലിം മോഡലും അവതരിപ്പിക്കാൻ താൽപര്യം കാണിച്ചിരിക്കുകയാണ്. സ്ലിം സ്മാർട്ട്ഫോണുകളുടെ വിപണിയിൽ സാംസങും ആപ്പിളും മുഖാമുഖം വരുമെന്ന് ആസൂത്രണം ചെയ്യപ്പെടുന്നു.
