വിപണിയിൽ വൻ നേട്ടവുമായി നിസാൻ; കയറ്റുമതിയിൽ റെക്കോർഡ്
നിസാൻ മോട്ടോർ ഇന്ത്യ 2024 ഡിസംബറിൽ 11,676 യൂണിറ്റുകളുടെ മൊത്തം വിൽപ്പന കൈവരിച്ചു. ഇതിൽ 2,118 യൂണിറ്റുകൾ ഇന്ത്യയിലും 9,558 യൂണിറ്റുകൾ കയറ്റുമതിയിലും വിറ്റത് കയറ്റുമതിയേയും ആഗോള വിപണിയേയും നിസാൻ കൂടുതൽ ആശ്രയിക്കുന്നതായി തെളിയിക്കുന്നു. ഇത് 2024 ഡിസംബറിലെ ഏറ്റവും ഉയർന്ന വിൽപ്പനയുമാണ്. കയറ്റുമതി വിൽപ്പനയിൽ 2024 ഡിസംബറിൽ 72% വർദ്ധനവുണ്ടായി, നവംബറിനെ അപേക്ഷിച്ച് 43% മെച്ചവുമാണ്. എന്നാൽ, 2024-ൽ ആഭ്യന്തര വിപണിയിൽ 3.54% ഇടിവ് സംഭവിച്ചു. 2024-ൽ കമ്പനി 91,184 യൂണിറ്റുകൾ വിറ്റത് 62,175 യൂണിറ്റുകൾ കയറ്റുമതിയിലും 29,009 യൂണിറ്റുകൾ ആഭ്യന്തര വിപണിയിലുമായിരുന്നു.
2023-ലെ 31,667 കയറ്റുമതി യൂണിറ്റുകളെ അപേക്ഷിച്ച് വലിയ വളർച്ചയാണിത്. 2024-ൽ പുറത്തിറക്കിയ മാഗ്‌നൈറ്റിന് നവംബർ മാസത്തോടെ 10,000-ത്തിലധികം ബുക്കിംഗ് ലഭിച്ചു. ഈ എസ്‌യുവിയുടെ ആകെ വിൽപ്പന 1,50,000 യൂണിറ്റുകൾ കടന്നതും ദക്ഷിണാഫ്രിക്കയിലേക്ക് 2,700 യൂണിറ്റുകൾ കയറ്റുമതിയാക്കിയതും ശ്രദ്ധേയമായ നേട്ടങ്ങളാണ്.
45-ലധികം പുതിയ രാജ്യങ്ങളിൽ മാഗ്‌നൈറ്റിനെ അവതരിപ്പിച്ച് കമ്പനി വിപുലീകരണ പദ്ധതികൾ ശക്തിപ്പെടുത്തുന്നു. ലെഫ്റ്റ് ഹാൻഡ് ഡ്രൈവ് മോഡൽ ദക്ഷിണാഫ്രിക്കയിലേക്കു പുറത്തിറക്കുകയും ചെയ്തു. ഉപഭോക്തൃ ആക്സസ്ബിലിറ്റിക്കായി നാസിക്, ഗോരഖ്പൂർ തുടങ്ങിയ സ്ഥലങ്ങളിൽ പുതിയ ഡീലർഷിപ്പുകൾ തുറന്ന നിസാൻ, ഇന്ത്യയിൽ 300 ടച്ച് പോയിൻ്റുകൾ സ്ഥാപിക്കാനാണ് ലക്ഷ്യമിടുന്നത്. 2024-ൽ പുതിയ മാഗ്‌നൈറ്റ്, എക്സ്-ട്രെയിൽ തുടങ്ങിയ മോഡലുകൾ പുറത്തിറക്കി മാർക്കറ്റിൽ മാറ്റം കൊണ്ടുവരുവാനാണ് നിസാൻ ശ്രമിക്കുന്നത്.
ഡിസംബറിലെ വിൽപ്പന ഡീലർമാരുടെയും ഉപഭോക്താക്കളുടെയും പിന്തുണയുടെ പ്രകടമാണെന്നും ഉപഭോക്തൃ പ്രാധാന്യത്തിന് കൂടുതൽ പ്രാധാന്യം നൽകുമെന്ന് നിസാൻ മാനേജിംഗ് ഡയറക്ടർ സൗരഭ് വത്സ അറിയിച്ചു.
