മില്‍മയെ അനുകരിച്ച മില്‍നയ്ക്ക് ഒരു കോടി രൂപ പിഴ
തിരുവനന്തപുരം: (KVARTHA) കേരളത്തിന്റെ സ്വന്തം പാല്‍ ബ്രാൻഡായ മില്‍മയുടെ പേരും രൂപകല്‍പ്പനയും അനുകരിച്ച്‌ ഉല്‍പ്പന്നങ്ങള്‍ വിപണിയിലിറക്കിയ ‘മില്‍ന’ എന്ന കമ്പനിക്ക് തിരുവനന്തപുരം പ്രിൻസിപ്പല്‍ കൊമേഴ്‌സ്യല്‍ കോടതി ഒരു കോടി രൂപ പിഴ ചുമത്തി.ഉപഭോക്താക്കളെ തെറ്റിദ്ധരിപ്പിക്കും വിധം മില്‍മയോട് സാദൃശ്യമുള്ള ലോഗോയും പാക്കറ്റുകളും ഉപയോഗിച്ച്‌ പാലുല്‍പ്പന്നങ്ങള്‍ വിറ്റഴിച്ചതിനാണ് ഈ കനത്ത പിഴ.മില്‍മ നല്‍കിയ പരാതിയുടെ അടിസ്ഥാനത്തിലാണ് കോടതിയുടെ വിധി. മില്‍മയുടെ പ്രശസ്തിയും ഉപഭോക്തൃ വിശ്വാസവും ചൂഷണം ചെയ്യാനുള്ള ശ്രമമാണ് മില്‍ന നടത്തിയത് എന്ന് കോടതി നിരീക്ഷിച്ചു. ഒരു കോടി രൂപ പിഴ കൂടാതെ, ആറ് ശതമാനം പിഴപ്പലിശയും മില്‍ന അടയ്‌ക്കേണ്ടി വരും.ഈ വിധി വ്യാജ ഉല്‍പ്പന്നങ്ങള്‍ വിപണിയിലിറക്കി ഉപഭോക്താക്കളെ വഞ്ചിക്കുന്നവർക്ക് ഒരു ശക്തമായ മുന്നറിയിപ്പാണെന്ന് മില്‍മ ചെയർമാൻ കെ.എസ്. മണി അറിയിച്ചു. ഗുണമേന്മയുള്ള ഉല്‍പ്പന്നങ്ങള്‍ ജനങ്ങളിലേക്ക് എത്തിക്കുന്നതിനും ബ്രാൻഡിന്റെ വിശ്വാസ്യത കാത്തുസൂക്ഷിക്കുന്നതിനും മില്‍മ പ്രതിജ്ഞാബദ്ധമാണെന്ന്അദ്ദേഹം വ്യക്തമാക്കി.ഈ കേസ് വ്യാജ ബ്രാൻഡുകള്‍ക്കെതിരെ നിയമപരമായ നടപടികള്‍ക്ക് പ്രചോദനമാകുമെന്നും, ബ്രാൻഡുകളുടെ പകർപ്പവകാശം സംരക്ഷിക്കുന്നതിന് ഇത് ഒരു നാഴികക്കല്ലാകുമെന്നും നിയമവൃത്തങ്ങള്‍ വിലയിരുത്തുന്നു.
