താരിഫ് വര്‍ധനയുടെ പിന്നാലെ നേട്ടം; പിന്നീട് ഉപഭോക്തൃ നഷ്ടത്തില്‍ ബിഎസ്എന്‍എല്‍, ട്രായ് റിപ്പോര്‍ട്ട് പുറത്ത്
ദില്ലി: രാജ്യത്തെ സ്വകാര്യ ടെലികോം സേവന ദാതാക്കൾ 2024 ജൂലൈയിൽ 25 ശതമാനം വരെ നിരക്കുകൾ ഉയർത്തിയതോടെ, പൊതു മേഖല ടെലികോം കമ്പനിയായ ബിഎസ്എൻഎല്ലിന് ഉപഭോക്തൃവൃദ്ധിയിൽ വലിയ നേട്ടം കൈവരിക്കാനായിരുന്നു. റിലയൻസ് ജിയോ, ഭാരതി എയർടെൽ, വോഡഫോൺ ഐഡിയ എന്നിവയിൽ നിന്ന് ദശലക്ഷക്കണക്കിന് ഉപഭോക്താക്കളാണ് ബിഎസ്എൻഎല്ലിലേക്ക് ചേക്കേറിയത്. എന്നാൽ ഈ മുന്നേറ്റത്തിന് ബ്രേക്ക് ചൊല്ലുന്നതുപോലെയുള്ള കണക്കുകളാണ് ഇപ്പോൾ പുറത്ത് വന്നിരിക്കുന്നത്.
ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) പുറത്തിറക്കിയ കണക്കുകൾ പ്രകാരം 2024 നവംബറിൽ ബിഎസ്എൻഎല്ലിന്റെ ഉപഭോക്തൃഅടിത്തറയിൽ വലിയ കുറവ് സംഭവിച്ചിട്ടുണ്ടെന്ന് വ്യക്തമാക്കുന്നു. നവംബറിൽ കമ്പനി 0.46 ദശലക്ഷം (460,000) പുതിയ ഉപഭോക്താക്കളെ നേടുകയുണ്ടായെങ്കിലും, 0.87 ദശലക്ഷം (870,000) പേരെ നഷ്ടപ്പെടുത്തി.
2024 ജൂലൈയിൽ സ്വകാര്യ ടെലികോം കമ്പനികൾ നിരക്കുകൾ ഉയർത്തിയതോടെ, ഉപഭോക്താക്കൾ ബിഎസ്എൻഎല്ലിലേക്ക് പോർട്ട് ചെയ്യുകയോ പുതിയ സിം വാങ്ങുകയോ ചെയ്തിരുന്നു. പക്ഷേ, പ്രതീക്ഷിച്ച നിലവാരത്തിലുള്ള സേവനം ബിഎസ്എൻഎല്ലിന് നൽകാനായില്ലെന്നാണ് നിരീക്ഷണം. 4ജി സേവനങ്ങൾ പുരോഗമിച്ചിട്ടും, ബിഎസ്എൻഎൽ നെറ്റ്‌വർക്കിനോട് ബന്ധപ്പെട്ട വ്യാപകമായ പരാതികൾ ഇപ്പോഴും നിലനിൽക്കുന്നുണ്ട്. ഡാറ്റ ലഭ്യമല്ല, കോളുകൾ നടത്താനാകുന്നില്ല എന്നിവയാണ് ഉപഭോക്താക്കളുടെ പ്രധാന പരാതി.
2024 ജൂലൈ മുതൽ ബിഎസ്എൻഎല്ലിലേക്ക് ഉപഭോക്താക്കളെ ആകർഷിക്കുന്നതിനുള്ള പ്രവണത ശക്തമായിരുന്നു. ജൂലൈയിൽ 0.5 ദശലക്ഷം, ഓഗസ്റ്റിൽ 2.1 ദശലക്ഷം, സെപ്റ്റംബറിൽ 1.1 ദശലക്ഷം, ഒക്ടോബറിൽ 0.7 ദശലക്ഷം പുതിയ ഉപഭോക്താക്കളെ ബിഎസ്എൻഎൽ നേടി. എന്നാൽ അതേസമയം, ജൂലൈയിൽ 0.31 ദശലക്ഷം, ഓഗസ്റ്റിൽ 0.26 ദശലക്ഷം, സെപ്റ്റംബറിൽ 0.28 ദശലക്ഷം, ഒക്ടോബറിൽ 0.51 ദശലക്ഷം ഉപഭോക്താക്കളെ കമ്പനി നഷ്ടപ്പെടുകയും ചെയ്തു.
മറ്റ് ടെലികോം കമ്പനികളുടെ നിരക്ക് വർധനയും ഉപഭോക്തൃമാറ്റവും ബിഎസ്എൻഎല്ലിന് തുടക്കത്തിൽ ഗുണംചെയ്തതായിരുന്നുവെങ്കിലും, നിരക്ഷമമായ സേവനം ഉപഭോക്താക്കളെ നിരാശരാക്കുന്നതായി പുതിയ കണക്കുകൾ സൂചിപ്പിക്കുന്നു.
