ഇന്ത്യൻ റെയിൽവേയുടെ എല്ലാ സേവനങ്ങളും ഒറ്റ ആപ്പിൽ; ‘സ്വറെയിൽ’ ആപ്പ് അവതരിപ്പിച്ച റെയിൽവേ മന്ത്രാലയം
ഇന്ത്യൻ റെയിൽവേയുടെ എല്ലാ സേവനങ്ങളും ഒരൊറ്റ പ്ലാറ്റ്‌ഫോമിൽ ലഭ്യമാകുന്ന പുതിയ ആപ്പ് ‘സ്വറെയിൽ’ റെയിൽവേ മന്ത്രാലയം അവതരിപ്പിച്ചു.
സെൻറർ ഫോർ റെയിൽവേ ഇൻഫർമേഷൻ സിസ്റ്റംസ് (CRIS) ആണ് ഈ ആപ്പ് രൂപകൽപ്പന ചെയ്‌തത്, യാത്രക്കാർക്ക് റെയിൽവേയുമായി ബന്ധപ്പെട്ട എല്ലാ സേവനങ്ങളും ഒരുമിച്ച് ലഭ്യമാകുന്നു. ഇതുവരെ റെയിൽവേയുടെ വിവിധ സേവനങ്ങൾ നേടാൻ വിവിധ ആപ്പുകൾ ഉപയോഗിക്കേണ്ടി വന്നിരുന്നുവെങ്കിലും, പുതിയ സൂപ്പർ ആപ്പ് ഈ പ്രശ്‌നത്തിന് പരിഹാരമാകും.
ആപ്പ് നിലവിൽ ഗൂഗിൾ പ്ലേ സ്റ്റോർ, ആപ്പിള്‍ ആപ്പ് സ്റ്റോർ എന്നിവയിലൂടെ ബീറ്റ ടെസ്റ്റിംഗിനായി ലഭ്യമാണ്. പരിശോധന പൂർത്തിയാകുമ്പോൾ ഇത് പൊതുജനങ്ങൾക്ക് ഉപയോഗത്തിനായി ലഭ്യമാകും. നിലവിൽ റെയിൽകണക്ട് അല്ലെങ്കിൽ യുടിഎസ് മൊബൈൽ ആപ്പുകൾ ഉപയോഗിക്കുന്നവർക്ക് അവരുടെ നിലവിലുള്ള ക്രെഡൻഷ്യലുകൾ ഉപയോഗിച്ച് നേരിട്ട് ലോഗിൻ ചെയ്യാൻ കഴിയും.
സിംഗിൾ സൈൻ-ഓൺ, എളുപ്പത്തിലുള്ള ഓൺബോർഡിംഗ്/സൈൻ-അപ്പ് തുടങ്ങിയ സവിശേഷതകൾ പുതിയ ആപ്പിന്റെ ഭാഗമായി നൽകും. അതോടൊപ്പം, യാത്രക്കാർക്ക് റെയിൽവേയുടെ വിവിധ സേവനങ്ങളെ കുറിച്ച് കൂടുതൽ പിന്തുണയും ലഭ്യമാകും.
ആപ്പ് നൽകുന്ന പ്രധാന സേവനങ്ങൾ:
- റിസർവേഷൻ ടിക്കറ്റുകൾ ബുക്ക് ചെയ്യാം
- ജനറൽ, പ്ലാറ്റ്ഫോം ടിക്കറ്റ് ബുക്കിംഗിനുള്ള സൗകര്യം
- ചരക്ക്, പാഴ്സൽ സംബന്ധിച്ച അന്വേഷണങ്ങൾ
- ട്രെയിൻ സ്റ്റാറ്റസ്, PNR വിവരങ്ങൾ
- ട്രെയിനിൽ ഭക്ഷണം ഓർഡർ ചെയ്യാനുള്ള സംവിധാനം
- പരാതികൾ രജിസ്റ്റർ ചെയ്യുന്നതിനുള്ള സംവിധാനം
