ഉപഭോക്തൃ പരാതികൾക്ക് വേഗത്തിൽ പരിഹാരം
വ്യവഹാരത്തിന് മുമ്പുള്ള ഘട്ടത്തില്‍ തന്നെ ഉപഭോക്തൃ പരാതികള്‍ പരിഹരിക്കുന്നതിനുള്ള ഒരു ആവാസവ്യവസ്ഥ സര്‍ക്കാര്‍ നടപ്പിലാക്കുകയാണെന്ന് ഉപഭോക്തൃ കാര്യ സെക്രട്ടറി നിധി ഖരെ.
ലോക ഉപഭോക്തൃ അവകാശ ദിന വെബിനാറില്‍ സംസാരിക്കവേ, ഉപഭോക്തൃ പരാതികള്‍ പരിഹരിക്കുന്നതിനായി നാഷണല്‍ കണ്‍സ്യൂമര്‍ ഹെല്‍പ്പ്ലൈന്‍ (എന്‍സിഎച്ച്) സംവിധാനത്തിലൂടെ തടസ്സരഹിതവും വേഗതയേറിയതുമായ ഒരു പ്ലാറ്റ്ഫോം സൃഷ്ടിച്ചിട്ടുണ്ടെന്ന് ഖരെ പറഞ്ഞു.
ആര്‍ട്ടിഫിഷ്യല്‍ ഇന്റലിജന്‍സ് ഉപകരണങ്ങള്‍ ഉപയോഗിച്ചുള്ള എന്‍സിഎച്ചിന്റെ പരിവര്‍ത്തനം അതിന്റെ കോള്‍-ഹാന്‍ഡ്ലിംഗ് ശേഷിയില്‍ ഗണ്യമായ വര്‍ധനവിന് കാരണമായി. 2015 ജനുവരിയില്‍ എന്‍സിഎച്ചിന് ലഭിച്ച 14,795 കോളുകളില്‍ നിന്ന് ഇന്ന് അത് പത്തിരട്ടിയായി വര്‍ധിച്ചതായി അവര്‍ പറഞ്ഞു.
എന്‍സിഎച്ച് ആധുനികവല്‍ക്കരണത്തിന്റെ മൂന്നാം ഘട്ടം നിരവധി പ്രശ്‌നങ്ങള്‍ കൂടുതല്‍ സുഗമമാക്കുകയും കുറഞ്ഞ സമയത്തിനുള്ളില്‍ പരാതികള്‍ പരിഹരിക്കുകയും ചെയ്യുമെന്ന് അവര്‍ പറഞ്ഞു.
ഇതുവരെ, ഉപഭോക്തൃ പരാതികള്‍ 45 ദിവസത്തിനുള്ളില്‍ പരിഹരിച്ചു. ‘എഐ ഉപകരണങ്ങള്‍ ഉപയോഗിച്ച്, ഏഴ് ദിവസത്തിനുള്ളില്‍ മിക്ക പരാതികളും ഞങ്ങള്‍ പരിഹരിക്കാന്‍ പോകുകയാണ്.
”വ്യവഹാരത്തിന്റെ കഷ്ടപ്പാടുകളിലൂടെ ആരും കടന്നുപോകാതിരിക്കാന്‍, ഉപഭോക്തൃ പരാതികള്‍ അതിനു മുമ്പുള്ള ഘട്ടത്തില്‍ തന്നെ പരിഹരിക്കപ്പെടണമെന്ന് ഞങ്ങള്‍ ആഗ്രഹിക്കുന്നു,’ സെക്രട്ടറി കൂട്ടിച്ചേര്‍ത്തു.
