ടിക്‌ടോക് ഏറ്റെടുക്കാൻ മൈക്രോസോഫ്റ്റ്; ചർച്ചകൾ ആരംഭിച്ചു
വാഷിംഗ്ടൺ: ചൈനീസ് വീഡിയോ ഷെയറിംഗ് പ്ലാറ്റ്‌ഫോമായ ടിക്‌ടോക് ഏറ്റെടുക്കാൻ മൈക്രോസോഫ്റ്റ് ചർച്ചകൾ ആരംഭിച്ചതായി യുഎസ് പ്രസിഡന്റ് ഡൊണാൾഡ് ട്രംപ് സ്ഥിരീകരിച്ചു. ടിക്‌ടോക് ഏറ്റെടുക്കൽ നടപടികളിൽ നിന്ന് ചൈനയെ ഒഴിവാക്കുമെന്ന് ട്രംപ് വ്യക്തമാക്കിയെങ്കിലും, മൈക്രോസോഫ്റ്റോ ടിക്‌ടോക്കോ ഇതുസംബന്ധിച്ച ഔദ്യോഗിക പ്രതികരണം നൽകാൻ തയ്യാറായിട്ടില്ലെന്ന് ബിബിസി റിപ്പോർട്ട് ചെയ്യുന്നു. ടിക്‌ടോക്യുടെ അമേരിക്കൻ ബിസിനസ് വിറ്റഴിക്കാനുള്ള സമ്മർദ്ദം ബൈറ്റ്‌ഡാൻസ് നേരിടുമ്പോൾ, ഏറ്റെടുക്കലിനായി നിരവധി യുഎസ് കമ്പനികൾ രംഗത്തുവന്നേക്കാമെന്നും ഒരു ഏറ്റെടുക്കൽ മത്സരം ഉണ്ടായേക്കാമെന്നുമാണ് ട്രംപിന്റെ അഭിപ്രായം.
അമേരിക്കയിൽ പ്രവർത്തനം തുടരണമെങ്കിൽ, ടിക്‌ടോക് 50% ഓഹരികൾ യുഎസിന് നൽകണമെന്നും ട്രംപ് മുൻപ് ആവശ്യപ്പെട്ടിരുന്നു. ഇതിന് പിന്നാലെയാണ് മൈക്രോസോഫ്റ്റ് ഏറ്റെടുക്കലിനായി ചർച്ചകൾ ആരംഭിച്ചത്. കഴിഞ്ഞ കുറച്ച് ആഴ്ചകളായി ടിക്‌ടോക് അമേരിക്കയിൽ നിരോധനത്തിനരികിലെത്തി. ദേശീയ സുരക്ഷാ ആശങ്കകൾ ചൂണ്ടിക്കാട്ടി നിരോധന നടപടികൾ ആരംഭിച്ചെങ്കിലും, യുഎസ് നീതിന്യായ സംവിധാനത്തെയും ട്രംപിനെയും അനുസരിക്കാൻ ടിക്‌ടോക് തീരുമാനിച്ചതോടെ നിരോധനം താത്കാലികമായി മരവിപ്പിച്ചു. നിലവിൽ, ടിക്‌ടോകിന് 75 ദിവസത്തെ അവകാശം നൽകിയാണ് യുഎസ് തുടരുന്നത്. ടിക്‌ടോക് 50% ഓഹരികൾ അമേരിക്കയ്ക്ക് കൈമാറാമെന്ന നിലപാട് സ്വീകരിച്ചതിനാലാണ് കമ്പനിക്ക് പ്രവർത്തനം തുടരാൻ അവസരം ലഭിച്ചതെന്നാണ് റിപ്പോർട്ടുകൾ. മറ്റൊരു പ്രധാന ടെക് പ്രമുഖനായ ഇലോൺ മസ്കും ടിക്‌ടോക് ഏറ്റെടുക്കാൻ താൽപര്യം പ്രകടിപ്പിച്ചുവെന്ന വാർത്തകളും പുറത്തുവന്നിട്ടുണ്ട്. മസ്ക് ട്രംപിന്റെ വിശ്വസ്തരിലൊരാളാണ്. യുഎസിൽ 17 കോടി ഉപയോക്താക്കളുള്ള ടിക്‌ടോക് ആഗോള തലത്തിൽ ഏറ്റവും പ്രചാരമുള്ള വീഡിയോ ഷെയറിംഗ് പ്ലാറ്റ്‌ഫോമുകളിലൊന്നാണ്.
