ജിയോ-എയര്‍ടെല്‍ മത്സരം കടുക്കുന്നു

ഇന്ത്യൻ ടെലികോം മേഖലയിൽ പ്രമുഖരായ റിലയൻസ് ജിയോയും എയർടെല്ലും തമ്മിലുള്ള മത്സരം ശക്തമാകുകയാണ്. വിപണി വിഹിതത്തിൽ നിന്നുള്ള വരുമാനത്തിൽ (RMS) ഇരു കമ്പനികളും മികവ് കാട്ടുന്നു. സുനിൽ മിത്തലിന്റെ നേതൃത്വത്തിലുള്ള എയർടെൽ വിപണി വിഹിതം 38.6 ശതമാനമായി ഉയർത്തിയപ്പോൾ, മുകേഷ് അംബാനിയുടെ നേതൃത്വത്തിലുള്ള ജിയോയുടെ വിപണി വിഹിതം 41.6 ശതമാനമാണ്. ബ്രോക്കറേജ് സ്ഥാപനമായ CLSA യുടെ റിപ്പോർട്ടിലാണ് ഈ വിവരങ്ങൾ. മൊബൈൽ ബ്രോഡ്ബാൻഡ് ഉപയോക്താക്കളുടെ വലിയ വർധനയും നഗര-ഗ്രാമ മേഖലകളിൽ വിപണി ശക്തമാക്കാനായത് ഇരു കമ്പനികൾക്കും മികച്ച നേട്ടമാക്കാൻ സഹായകമായി. 2024-ൽ ജിയോയിൽ 1.9 കോടി 4ജി/5ജി ഉപഭോക്താക്കളെയാണ് ചേർത്തത്.

അതേസമയം, എയർടെൽ 2.6 കോടി ഉപയോക്താക്കളെ സ്വന്തമാക്കി. ടോപ്പ്-എൻഡ് ഉപഭോക്താക്കളെ ലക്ഷ്യമിട്ട് പോസ്റ്റ്‌പെയ്ഡ് മേഖലയിലുണ്ടാക്കിയ മികവാണ് എയർടെല്ലിന് നേട്ടമായത്.

5ജി വളർച്ച തുടരുമെന്ന് വിലയിരുത്തൽ

2025-ൽ 5ജി മേഖലയിൽ വലിയ വളർച്ചയുണ്ടാകുമെന്ന് വിദഗ്ധർ പ്രവചിക്കുന്നു. കൂടുതൽ ഉപഭോക്താക്കളെ 5ജിയിലേക്ക് ആകർഷിക്കാനായി ഇരു കമ്പനികളും പ്രവർത്തിക്കും. 2027 സാമ്പത്തിക വർഷത്തോടെ ജിയോയും എയർടെല്ലും ചേർന്ന് ടെലികോം വിപണിയിൽ 84 ശതമാനം വിഹിതം കൈവശം വയ്ക്കുമെന്നും CLSA സൂചിപ്പിക്കുന്നു.

വോഡാഫോണിന് തിരിച്ചടി

അതേസമയം, സാമ്പത്തിക പ്രതിസന്ധിയിലായ വോഡാഫോൺ ഐഡിയയുടെ RMS 2024-ൽ 168 ബേസിസ് പോയിന്റ് കുറഞ്ഞ് 14.4 ശതമാനമായി. 4ജി നെറ്റ്‌വർക്ക് വികസനത്തിനും 5ജി വിന്യാസത്തിനും ആവശ്യമായ നിക്ഷേപങ്ങൾ നടത്തുന്നതിൽ കമ്പനി ബുദ്ധിമുട്ടുകളിലാണ്. ഉപഭോക്തൃ നഷ്ടം company-നെ കൂടുതൽ ബാധിച്ചു. 2025 വോഡാഫോണിന് നിർണായക വർഷമാകുമെന്നാണ് വിലയിരുത്തൽ. കടബാധ്യത, 5ജി വിപുലീകരണം, എജിആർ കുടിശിക എന്നിവയെ മറികടക്കാനുള്ള ശ്രമത്തിൽ യു.കെ ആസ്ഥാനമായ വോഡാഫോണും ആദിത്യ ബിർള ഗ്രൂപ്പും കൂടുതൽ ശക്തമായി മുന്നോട്ടു പോകേണ്ടിവരും.